Ómirde bolǵan oqiǵalarǵa negizdelgen filmderdiń ish pystyrýy múmkin emes. Óitkeni mundai kinolardaǵy keiipkerlerdiń prototipteri — peshenesine qiyn taǵdyr, airyqsha sezim,tarihi oqiǵalar jazylǵan shynaiy adamdar. Tómende kórermendi tánti etken sheteldiń 7 úzdik filmi toptastyrylǵan.
Bishi qyz/Tantsovshitsa
La danseuse
Talantty jas qyz uly aktrisa atanyp, óz darynymen Amerikany baǵyndyrýdy armandaidy.Mariia-Lýiza maqsatyna jetedi: ol ónerdiń jańa baǵyty — moderndi týdyryp, ózi aǵaly-inili Liýmer men Týlýz-Lotrektiń mýzasyna ainalady. Sulý qyzdyń ómirindegi jarqyn sátter kórermendi baýramai qoimaidy.
Danyshpan/Genii
Genius
Eki talantty jigit – jazýshy Tomas Výlf pen baspager Maks Perkinstiń dostyǵy jaily film. Tamasha akterlik oiyn, tartymdy siýjet jáne keremet iýmordyń kórermeni bolǵyńyz kelse, bul film sizdiń kóńilińizden shyǵatyny anyq.
Eddi — «Qyran»/Eddi — «Orel»
Eddie the Eagle
Eddi bala kúninen Olimpiada oiyndaryna qatysýdy armandaidy. Kóptegen umtylystar men sátsizdikterden keiin ol britan quramasynyń sapyna tramplinshi bolyp qosylady. Eddi aqyry tanymaldyqqa ie bolady. Biraq jeńistiń arqasynda emes, ishki rýhynyń myqtylyǵy men eshqashan berilmeitin qaisarlyǵynyń arqasynda. Bul filmdi kórgennen keiin keritartpalyǵyńyzdy umytyp, asyl armanyńyzdy júzege asyrýǵa qulshynysyńyz oianary sózsiz.
Snoýden
Snowden
Dúniejúzi tarihyndaǵy eń iri qupiialardyń biri ashqan adam jaily film. Ol óz eliniń turǵyndary men ózge el azamattarynyń sońynan ańdyǵan AQSh agentteriniń qupiia materialdaryn taýyp, álemge shyndyqty jaiyp saldy. Alaida bul shyndyq Snoýdendi mansaptan, súiiktisin jáne eń sumdyǵy, Otanynan aiyrady. «Biz ómir súrip otyrǵan álemniń zańdylyqtary qandai?» degen saýal tastaityn film.
Dignidad koloniiasy /Koloniia Dignidad
Colonia
Nemis jýrnalisi Danieldi qupiia politsiia Chilige urlap ketedi. Ábden azaptaǵannan keiin ony Úshinshi reih qashqyndarynyń uiasy – Dignidad koloniiasyna jiberedi. Danieldiń súigen qyzy Lena jigitin qutqarý úshin sol qorqynyshty jerge jalǵyz attanady. Emotsionaldyq turǵyda óte aýyr, biraq kórýge turarlyq film.
Ardyń aidaýymen /Po soobrajeniiam sovesti
Hacksaw Ridge
Dezmond Doss – Ekinshi dúniejúzilik soǵys kezinde maidan dárigeri bolǵan amerikalyq jaýynger. Soǵys kezinde ol qolǵa qarý ustaýdan, kisi óltirýden úzildi-kesildi bas tartady. Tipti, óz ómirine qaýip tónip tursa da, ainalasyn qatygezdik pen qanypezerlik qorshasa da, Doss óz ustanymynan ainymaidy. Maidan sýretterin óte shynaiy ári keń aýqymda sýrettegen áserli film.
Daniialyq qyz/Devýshka iz Danii
The Danish Girl
Sýretshi Gerda Vegener óziniń kúieýi Einar Vegenerdi áiel model retinde qyzmet kórsetýin ótinedi. Iaǵni áiel keipine enip, sýretin salyp bolǵansha tapjylmai otyrady. Sol kartinalardyń arqasynda Gerda keń tanymaldyqqa ie bolady. Al Einar ózine unaityn kásip tapqanyn túsinedi. Ol Lili Elbe degen atpen ómir súre bastaidy jáne tarihta alǵashqy bolyp hirýrgiialyq jolmen jynysyn aýystyrady. Kórermenin beijai qaldyrmaityn kúrdeli, dramalyq film.
Anar Lepesova, "Túrkistan" gazeti
