Túrkistan oblysynyń turǵyny jarty million teńgeni Mádeniet jáne sport ministri Arystanbek Muhamediulynyń qolynan aldy. Azamat Sapar týrnikti urshyqsha iiretinin kórsetip, 500 myń teńgeni utyp aldy.
Astany qalasynyń 20-jyldyǵyn merekeleý aiasynda «Etnoaýyl» ulttyq-mádeni kesheninde sáýir aiynyń sońynda ministr Arystanbek Muhamediuly bastaǵan ChallengeStreetWorkouttiń qorytyndysy shyǵaryldy. Bas-aiaǵy baiqaýǵa elimizdiń túrli óńirlerinen 167 ótinim tústi. Sonymen qatar, AQSh, Qytai memleketterinen de qatysýshylar belsendilik tanytty.
Qazylar alqasynyń pikirinshe, beinejazbalardyń avtorlary chellendjge asa jaýapkershilikpen qaraǵan. 167 ótinimniń 126-sy qazylar alqasynyń qaraýynan ótti, Almaty, Astana, Taldyqorǵan, Qaraǵandy oblysynan eń kóp ótinim kelip túsken.
Qatysýshylar arasynda elimizge tanymal Serik Sápiev, Ádil Ahmetov, Qairat Nurtas, Denis Ten, Galib Djafarov, Qanat Islam, Jaqsylyq Úshkempirov, Iýrii Melnichenko, Nurbaqyt Teńizbaev, Áset Imanbaev, Ardaq Nazarov, Móldir Áýelbekova, Melomen toby jáne basqa da sport jáne óner qairatkerleri bar.
Ótinimdi tipti ujym bolyp jibergender bar, olardyń arasynda – Ulttyq shtattyq komandalar rezervi direktsiiasy, Jarkent Arasan sanatorii, Aqtóbe oblysynyń sport jáne dene shynyqtyrý basqarmasy, úkimet ókilderi – Mańǵystaý oblysynyń ákimi Eraly Toǵjanov, Almaty oblysy ákiminiń orynbasary Jaqsylyq Omar da qatysqan.
Arystanbek Muhamediuly atalǵan chellendjdiń salaýatty ómir saltyn qalyptastyrýda mańyzdylyǵyn atap ótti.
«Osy chellendjdiń qatysýshylaryna alǵys bildiremin. Bul bizdiń sońǵy aktsiiamyz emes, biz budan ári de mundai sharalardy jalǵastyramyz. Biz jaqyn arada Aqtaý qalasynda sport alańyn salamyz», - dedi Arystanbek Muhamediuly.
Eń úzdik roliktiń avtory aqtaýlyq Eldar Iagiaev. Ol 10 myń daýys jinady. Endi onyń qalasynda kásibi kóshe alańy paida bolady.
Aqtóbe qalasynyń turǵyny, 8 jastaǵy rekordshy Musa Týrkýmbaevta yntalandyrý syilyǵyna ie boldy. Almatylyq Saiat Dúisenbi de nazardan tys qalmady. Qostanai qalasynyń IIM Akademiiasy «Úzdik komandalyq beinejazba» atalymynda úzdik shyqty, «Úzdik motivatsiialyq beinejazba» Tolaǵai Shynbolatovtyń enshisinde, al Ulttyq shtattyq komandalar rezerviniń beinejazbasy «Eń sapaly video» atalymynda úzdik atandy.
