Stokgolmde Shvetsiia, Daniia, Norvegiia jáne Finliandiiada turatyn otandastardyń biznes-forýmy ótti, dep habarlaidy "Ult aqparat".
21 qazan kúni Stokgolmde Shvetsiia, Daniia, Norvegiia jáne Finliandiiada turatyn otandastardyń biznes-forýmy boldy. Forým – Qazaqstannyń Tuńǵysh Prezidenti – Elbasy Nursultan Nazarbaevtyń bastamasymen bekitilgen «Otandastar Qory» KEAQ jáne Dúniejúzi qazaqtary qaýymdastyǵynyń Soltústik Eýropada turatyn qazaqtarmen bailanysty nyǵaitý baǵdarlamasynyń bir bóligi.
Oǵan qazaq diasporalarynyń liderleri, belsendileri, Qazaqstannyń Shvetsiiadaǵy elshisi Qairat Ábdirahmanov, Dúniejúzi qazaqtary qaýymdastyǵy tóraǵasynyń orynbasary Arǵyn Ospanov, «Otandastar Qorynyń» jaýapty qyzmetkerleri, Shvetsiianyń Qazaqstandaǵy tuńǵysh elshisi Manne Vengborg, Qazaqstannyń Daniia, Finliandiia jáne Shvetsiiadaǵy qurmetti konsýldary, Soltústik Eýropa elderindegi kompaniialarda jumys isteitin qazaqtar, Túrkistan, Qaraǵandy oblystarynyń jún óńdeý, aýyl sharýashyly, agrotýrizm siiaqty salalardaǵy biznesmenderi qatysty.
Qaýymdastyq pen Qor ókilderi búkil álemde «Qazaq úii» Qazaq mádeni-iskerlik úiiniń quramyna kiretin mádeni ortalyqtar men iskerlik úileriniń jelisin qurý josparlaryn bólisti.
Biznes-forýmǵa qatysýshylar shaǵyn, orta jáne iri biznestegi bastamalardy yntalandyrý, ózara yqpaldastyq tetikteri, startaptardy damytý máselelerin talqylady. Qatysýshylarǵa Qazaqstan óńirlerinde biznes ashyp, damytýǵa qolaily investitsiialyq áleýet tanystyryldy. Kezdesýde qalpyna keletin energiia, aqparat tehnologiialary, qurylys materialdary, shikizat óńdeý, munai himiiasy, taý-ken ónerkásibi, kólik jáne logistika, aýyl sharýashylyǵy, bilim-ǵylym, sonyń ishinde túrkologiia, týrizm salalaryndaǵy ózekti jobalar aiqyndaldy.
Sonymen qatar Qor ókilderi barsha qazaq diasporasymen tyǵyz bailanys ornatýǵa ázir ekenin bildirdi. Ol úshin otandastar máselelerine jaýap beretin Biryńǵai bailanys ortalyǵy ashylǵan. Shvetsiiadaǵy biznes-forým biyl ótkizilgen altynshy forým boldy. Buǵan deiingisi 20 qyrkúiekte Londonda ótken.
Sharada Qazaqstan Jastar qaýymdastyǵynyń tóraǵasy Aidana Bekbergen kóptiń kózinshe elektrondyq formattaǵy ýaqyt kapsýlasyn bekitti. Jas otandastarǵa úndeý joldanǵan kapsýla 2025 jyly ashylady.
Qazaqstan delegatsiiasy quramynda barǵan kásipkerlerdiń usynystary da qatysýshylardy qyzyqtyrdy. «Shymkent Kashemir» jún óńdeý fabrikasynyń basshysy Shaǵanbek Qanjarbaiuly ónimin skandinav elderine satý nietin bildirdi. «Toksumak» eko-agro-kentiniń avtory Oljas Omarov turǵyndardyń áleýmettik ál-aýqatyn nyǵaitatyn ári etnikalyq qazaqtardy Qazaqstanǵa tartýǵa múmkindik beretin jobalardy damytýǵa investitsiia tartý týraly usynystaryn aitty.
