Májilis depýtattary eldegi jylý energetikasy salasynyń jai-kúiine alańdaýshylyq bildirdi, dep habarlaidy QazAqparat.
«Tutynýshylardy senimdi jáne úzdiksiz jylýmen qamtamasyz etý – turǵyndardyń ál-aýqatynyń negizgi kórsetkishi jáne halyqtyń órkenietti ómiri úshin mańyzdy qajettilik. Osy turǵyda biylǵy kóktemde Stepnogordaǵy JEO-da bolǵan apat saldarynan qala turǵyndary birneshe kún jylýsyz qaldy. Bul alańdatarlyq faktor jáne elimizdiń barlyq mekenderin úzdiksiz jylýmen qamtamasyz etý úshin dereý shara qabyldaýǵa shaqyratyn dabyl belgisi», - dedi depýtat Aleksandr Miliýtin Májilistiń jalpy otyrysynda.
Onyń aitýynsha, Qazaqstanda kóptegen JEO, sonyń ishinde Stepnogor JEO 50 jyldan astam ýaqyt buryn paidalanýǵa berilgen.
«JEO, qazandyqtar, jylý jelileri men jylý tutyný júielerindegi negizgi jáne qosalqy jabdyqtardyń moraldyq jáne fizikalyq tozýy shekti deńgeige jetti. Olar kez kelgen ýaqytta isten shyǵýy múmkin, buǵan dálel – jylýmen jabdyqtaý júielerindegi apattardyń jyl saiyn jiileýi. Mundai jaǵdaidyń basty sebebi Qazaqstanda jylý energetikasy salasynda biryńǵai saiasat, ony iske asyratyn memlekettik organ joq.
JEO úshin Energetika ministrligi, qazandyqtar úshin – jergilikti atqarýshy organdar, jylý jelileri úshin – Indýstriia jáne infraqurylymdyq damý ministrligi men jergilikti atqarýshy organdar jaýapty. Tarifterdi retteý – Ulttyq ekonomika ministrliginiń sharýasy. Sonymen birge, bul organdardyń quzyretteri naqty ajyratylmaǵan», - deidi Aleksandr Miliýtin.
Depýtattyń pikirinshe, osyndai bytyrańqylyq pen jylý energetikasy salasynda biryńǵai saiasattyń bolmaýynan JEO qazandyqtary men týrbinalary ýaqtyly jańartylmaidy, jylý jelileriniń tozǵan qubyrlary men sorǵy jabdyqtary josparly túrde aýyspaidy.
«Sondyqtan da Stepnogordaǵy jaǵdai elimizdiń kez kelgen óńirinde qaitalanýy múmkin», - dedi Aleksandr Miliýtin.
Buǵan jol bermeý úshin májilismender Úkimet deńgeiinde respýblika boiynsha jylý energetikasy men jylýmen jabdyqtaý jaǵdaiyna taldaý jasaýdy, salada biryńǵai saiasat ázirlep, ony iske asyrýǵa jaýapty vedomstvo qurýdy surady.
