Stambýl kelisiminen keiin Ýkraina million tonna aýyl sharýashylyq ónimderin eksporttaǵan. Bul jóninde juma kúni keshke Ýkraina prezidenti Vladimir Zelenskii málimdedi, dep habarlaidy Azattyq.
"Astyq eksporty bastamasynyń jumys istep jatqanyna shamamen bir ai boldy. Osy ýaqyt aralyǵynda Qara teńiz, Odessa jáne Ońtústik porttarynan 24 aqpannan beri alǵash ret million tonna aýyl sharýashylyq ónimderi eksporttaldy" dedi Zelenskii.
Onyń aitýynsha, Kiev bul kórsetkishti 3 million tonnaǵa jetkizýge talpynyp otyr. "Bul Afrika, Aziia jáne Eýropa úshin óte mańyzdy" dedi Ýkraina basshysy.
Resei syrtqy ister ministrligi 26 tamyzda BUU málimetine súiene otyryp, shamamen 846 tonna azyq-túlik eksporttalǵanyn habarlaǵan.
Resei men Ýkraina arasynda "astyq kelisimine" BUU jáne Túrkiia aralasýymen 22 shildede qol qoiylǵan. Azyq-túlik tielgen alǵashqy keme Odessadan 1 tamyzda shyqqan. Ýkraina prezidentiniń aitýynsha, sodan beri ýkrain porttarynan álemniń 15 eline 40-tan astam keme jóneltilgen.
Ýkraina - álemdegi iri astyq eksporttaýshy elderdiń biri.
Reseidiń Ýkrainamen soǵysynyń kesirinen Qara teńiz porttarynda eksportqa arnalǵan milliondaǵan tonna azyq-túlik jinalyp qaldy. Kiev jaǵdaiǵa Reseidi kinálasa, Máskeý astyq tielgen kemeler akvatoriiadaǵy ýkrain minalarynan shyǵa almai otyr dep málimdegen. BUU Afrika men Aziiadaǵy kedei elderde ashtyq bolýy múmkin ekenin eskertken.
