Stalindik qýǵyn-súrgindi keshirý múmkin emes. Bul týraly Memleket basshysy Qasym-Jomart Toqaev «31arnada» kórsetilgen «Prezident 2.0» derekti filminde aitty, dep habarlaidy QazAqparat.
Derekti film barysynda Qazaqstan Prezidenti ákesi Kemel jaiynda sóz qozǵaidy.
«Ol ómiriniń sońyna deiin, soǵysta jeńgeni úshin Stalinge riza bolyp ótti. Bul jerde úlken qarama-qaishylyq týyndap tur. Bir jaǵynan alyp qaraǵanda, ol Stalinniń kesirinen jetim qaldy. Al ekinshi jaǵynan alyp qarasaq, ol Stalindi Keńes odaǵy Qarýly kúshteriniń Uly qolbasshysy dep sanady», - dedi Memleket basshysy.
Osy oraida, Qasym-Jomart Toqaev jýrnalistiń «Siz úshin Stalin kim?» degen saýalyna jaýap berdi.
«Men úshin Stalin, árine iri tarihi tulǵa. Biraq, kez kelgen iri tarihi tulǵa siiaqty Stalinniń de qarama-qaishy jaqtary boldy. Jappai qýǵyn-súrgin, sonyń ishinde Qazaqstan jerindegi qýǵyn-súrgindi keshirý múmkin emes. Stalinniń soiylyn soqqan sholaq belsendilerdiń qolynan kóptegen qazaqtyń ziialy qaýym ókili túrmede jazyqsyzdan jazyqsyz qaza tapty. Ekinshi jaǵynan ákemmen de kelisemin. El basyna kún týǵan kezde Keńes odaǵyn basqaryp, eldi jeńiske jetkizdi», - dedi Qazaqstan Prezidenti.
