Ishki ister ministrligi Shyǵys Qazaqstan oblysynda quramynda altyny bar shikizatty zańsyz óndirý jáne óńdeýmen ainalysqan iri qylmystyq shemanyń jolyn kesti, dep habarlaidy ult.kz.
Polisia.kz málimetinshe, kúdiktiler jaýapkershiligi shekteýli seriktestikterdiń biriniń zańdy qyzmetin búrkemelep, jer qoinaýyn zańsyz paidalaný áreketin uiymdastyrǵan.
Jedel is-sharalar barysynda quqyqqa qaishy shemany uiymdastyrǵandar men basshylaryn qosa alǵanda 63 adam ustaldy. Sondai-aq zańsyz qyzmetke qatysy bar degen kúdikpen 13 shetel azamaty anyqtalǵan.
Tintý kezinde birneshe avtokólik pen arnaiy tehnika, 40 myń AQSh dollarynan astam qarajat, quramynda altyny bar shikizat pen daiyn altyn, sondai-aq qylmystyq áreketti dáleldeitin qujattar tárkilendi.
Aldyn ala málimet boiynsha, zańsyz óndiris qorshaǵan ortaǵa eleýli ziian keltirgen. Topyraq jamylǵysy buzylyp, tabiǵi landshaft ózgergen, ekojúiege aitarlyqtai zalal kelgen. Keltirilgen shyǵyn kólemi saraptama arqyly anyqtalýda.
Atalǵan derek boiynsha baǵaly metaldardyń zańsyz ainalymy jáne ekologiialyq quqyq buzýshylyqtar faktileri boiynsha sotqa deiingi tergeý bastaldy. Qazir qylmystyq shemanyń ózge qatysýshylaryn anyqtaý jumystary jalǵasýda.
IIM uiymdasqan qylmysqa qarsy kúres departamentiniń ókili Qýandyq Alpys tergeý aiasynda barlyq mán-jai anyqtalyp, kináliler zań aldynda jaýap beretinin málimdedi.
