Shyǵys Qazaqstan oblysynda Qytai azamattarynyń qatysýymen uiymdastyrylǵan zańsyz altyn óndirý faktisi anyqtaldy, dep habarlaidy ult.kz.
Qarjylyq monitoring agenttiginiń Shyǵys Qazaqstan oblysy boiynsha departamenti Ulttyq qaýipsizdik komiteti men prokýratýra qyzmetkerlerimen birlesip, Marqakól aýdanyndaǵy Aqbulaq aýyly mańynda ruqsatsyz altyn óndirgen toptyń zańsyz áreketin toqtatty.
Tergeý málimetinshe, quramynda altyny bar kendi zańsyz óndirý men óńdeý saldarynan tabiǵatqa aitarlyqtai ziian keltirilgen. Zańsyz qazba jumystary kezinde topyraqtyń qunarly qabaty búlinip, jer bederi ózgergen jáne ózen arnasy buzylǵan.
Zańsyz óndiris jalpy kólemi 30 gektar aýmaqta aýyr arnaiy tehnika men óndiristik keshenderdiń kómegimen júrgizilgen.
Agenttiktiń málimetinshe, zańsyz iske 30-dan astam adam tartylǵan. Olardyń arasynda Qytai Halyq Respýblikasynyń azamattary da bar.
Tintý barysynda alty 40 tonnalyq júk kóligi, tórt shynjyr tabandy ekskavator, bir tiegish jáne altyn quramdy kendi óndirýge ári jýýǵa arnalǵan eki óndiristik keshen tárkilendi.
Qazirgi ýaqytta sotqa deiingi tergeý jalǵasyp jatyr. Qazaqstan Respýblikasy Qylmystyq-protsestik kodeksiniń 201-babyna sáikes ózge aqparat jariialanbaidy.
Eske sala keteiik, buǵan deiin Aqmola oblysynda altyn óńdeýmen ainalysqan jasyryn tsehtyń áshkerelengeni habarlanǵan bolatyn.
