Shyǵys Qazaqstan oblysynda túzeý mekemesine tyiym salynǵan zattardy zańsyz jetkizý áreketiniń joly kesildi, dep habarlaidy ult.kz.
Oqiǵa túngi ýaqytta bolǵan. Jas jigit koloniia aýmaǵyna qorshaý arqyly tyiym salynǵan zattardy laqtyrmaq bolǵan sátte QAJ departamenti men №17 mekeme qyzmetkerleriniń qolyna tústi.
Polisia.kz jazýynsha, jeke tintý kezinde onyń janynan muqiiat oralǵan birneshe túiinshek tabylyp, tekserý barysynda olardyń ishinde Samsung, Redmi, Huawei, Oppo jáne iPhone markaly 15 uialy telefon bolǵany anyqtaldy.
Aldyn ala málimet boiynsha, tárkilengen qurylǵylar túzeý mekemesinde jazasyn ótep jatqan sottalǵandardyń birine arnalýy múmkin.
QAJ departamentiniń málimetinshe, uialy telefondar koloniialarǵa zańsyz ótkiziletin eń jii tyiym salynǵan zattardyń biri. Mundai qurylǵylar sottalǵandarǵa syrtqy ortamen baqylaýsyz bailanys ornatýǵa múmkindik berip, rejim talaptarynyń buzylýyna ákelýi yqtimal.
Qazirgi ýaqytta barlyq telefon tárkilenip, kúdiktini ákimshilik jaýapkershilikke tartý úshin qajetti materialdar jinaqtalyp jatyr.
– Qyzmetkerlerdiń jedel ári kásibi áreketiniń arqasynda zańsyz jetkizý áreketi der kezinde toqtatyldy. Túzeý mekemelerindegi qaýipsizdik pen rejimdik talaptardy qamtamasyz etý jumystary turaqty baqylaýda, – dedi ShQO boiynsha QAJ departamentiniń resmi ókili Saltanat Ojikanova.
