Foto: uiymdastyrýshylardan
Taldyqorǵan qalasynda shaǵyn fýtboldan dástúrli týrnir ótti. Sporttyq shara Sarqan aýdanyna qarasty Qarabóget aýylynyń 1980 jyly týǵan azamattarynyń bastamasymen uiymdastyrylyp, marqum bolǵan aýyldastardyń rýhyna arnaldy, dep habarlaidy Ult.kz.
Týrnirdiń basty maqsaty – ómirden ozǵan azamattardy eske alyp, aýyldastar arasyndaǵy dostyqty, birlikti nyǵaitý, úlkenge qurmet, kishige izet kórsetý jáne jastardy salaýatty ómir saltyna baýlý.
Bul jolǵy jarys marqum bolǵan azamattar – Áitenov Ádil Dúisetaiuly, Nurǵaliev Aidynbek Baiǵaliuly, Bajaev Almat Maratuly, Kirisbekov Dýlat Qojahmetuly jáne Bólegenov Registan Maratulynyń jarqyn beinesine arnaldy.
«Búgingi týrnir joǵary deńgeide ótti. Birliktiń arqasynda jastarymyz buqaralyq sportqa den qoiyp keledi. Sonymen qatar dúnieden ozǵan joldastaryn eske alyp, as berip, saýapty is jasap otyr. Bul igi bastama aldaǵy ýaqytta da jalǵasyn tabady dep senemin», – dedi Qarabóget aýylynyń týmasy, marqum Registan Bólegenovtiń ákesi Marat Bólegenuly.
Biyl úshinshi márte uiymdastyrylǵan týrnirge 11 komanda qatysty. Júldeli oryndar kelesidei úlestirildi: I oryn – 2001 jylǵy túlekter (100 000 teńge), II oryn – 1980 jylǵy túlekter (70 000 teńge), III oryn – 1988 jylǵy túlekter (50 000 teńge), IV oryn – yntalandyrý syilyǵy. Sonymen qatar úzdik oiynshylarǵa arnaiy kýboktar, medaldar, madaqtamalar jáne qarjylai syilyqtar tabystaldy.
«Týrnirden alǵan áserimdi sózben jetkizý qiyn. Osyndai sharalar bizdi jaqyndastyryp, umyt bola bastaǵan dostyqty qaita jandandyrady. Bul – naǵyz birlik pen jerlestik rýhynyń kórinisi», – dedi oiynǵa qatysýshy Nurlan Qabdoldin.
Al «1988» komandasynyń múshesi Nurbol Berikboluly óz oiyn bylai jetkizdi:
«Ár oiyn sátinde tek fýtbol emes, shynaiy dostyq pen ózara qoldaýdy sezindik. Osyndai kezdesýler kúndelikti tirshilikte alystap ketken baýyrlardy qaita tabystyryp, urpaqtar sabaqtastyǵyn kúsheitedi».
Týrnir barysynda Quran baǵyshtalyp, marqum azamattardyń rýhyna as berildi. Bul igi shara eldik pen erlikke, dostyq pen qurmetke bastaityn izgi dástúrge ainaldy.
