Foto: © Sputnik / Denis Abramov
Sport salasyndaǵy destrýktivti dini ideologiianyń taralýyna jol bermeýge baǵyttalǵan jol kartasynyń jobasy ázirlendi. Bul týraly Májilis depýtattarynyń saýalyna Premer-Ministrdiń orynbasary Tamara Dúisenovanyń jaýabynda aitylǵan, dep habarlaidy Kazinform agenttigi.
«Qazirgi tańda ýákiletti organ quqyq qorǵaý jáne arnaiy organdarmen birlesip, osy salada (teris aǵym jetegindegi adamdarmen jumysty kúsheitý) júieli jumystar júrgizip jatyr. Bul rette, destrýktivti dini ideologiianyń halyq arasynda taralýyna jol bermeý jónindegi 2023-2024 jyldarǵa arnalǵan is-sharalar jospary ázirlenip, iske asyrylýda. Ishki ister ministrligi, Ulttyq qaýipsizdik komiteti, Bas prokýratýra jáne basqa da memlekettik organdarmen 2023-2025 jyldarǵa arnalǵan sport salasyndaǵy destrýktivti dini ideologiianyń taralýyna jol bermeýge baǵyttalǵan jol kartasynyń jobasy ázirlendi», - dedi Úkimet basshysynyń orynbasary jaýabynda.
Onyń atap ótýinshe, internet jelisinde aqparattyq-profilaktikalyq jáne qarsy nasihat jumystaryn uiymdastyrý maqsatynda ádistemelik usynym ázirlenip, óńirlerge jiberildi.
«Ǵylym jáne joǵary bilim ministrligi joǵary oqý oryndarynda teologmamandardy daiarlaýdy júzege asyryp keledi. Sondai-aq «Nur-Mýbarak» islam mádenieti ýniversiteti janynda jyl saiyn teologtardyń biliktiligin arttyrý kýrstary uiymdastyrylýda. Osy turǵyda kásibi mamandardy daiarlaý, teologtardyń biliktiligin arttyrý, olarǵa qoiylatyn talaptardy birizdendirý qolǵa alynady. Qazirgi ýaqytta din salasyndaǵy bilim berý boiynsha negizgi qujat – 14 mamandyqtan turatyn «dini qyzmet salasyndaǵy kásibi standart» ázirlenýde. Jańa standart din salasyndaǵy mamandardyń biliktiligin arttyrady jáne úzdiksiz kásibi damýǵa múmkindik beredi. Sonymen qatar, Úkimette din máselesi boiynsha óńirlerdegi teolog mamandar men quzyrly organdardyń qatysýymen kezdesý ótti. Solardyń usynystary negizinde ázirlengen Jol kartasynyń jobasy qosymsha pysyqtalýda», - dedi Tamara Dúisenova.
