Foto: yandex.kz
Májilis depýtaty Daniiar Qasqaraýov Almatyda ornalasqan, jarty ǵasyr tarihy bar Ibragim Núsipbaev atyndaǵy №4 mektep-internatynyń múshkil jaǵdaiyn aityp, QR Premer-ministri Oljas Bektenovke saýal joldady, dep habarlaidy Ult.kz.
"Ol Almaty qalasyndaǵy alǵashqy qazaq mektebi deýge bolady. Bilim oshaǵy malshylardyń daryndy ul-qyzdarynyń, áleýmettik jaǵdaiy tómen, kópbalaly otbasylardan shyqqan jáne jetim balalardyń úlken qalada sapaly bilim alýy úshin arnaiy salynǵan bolatyn.
Bilim oshaǵy Almaty qalasynda ornalasqanymen, Almaty oblysyna qaraidy. Osynaý baiyrǵy mektep qabyrǵasynan elimizge belgili kóptegen tulǵalar shyqqan. Olardyń qatarynda belgili jazýshy Smaǵul Elýbai, áigili kompozitor Áset Beiseýov, qazaqtyń tuńǵysh kásibi rejisseri Asqar Toqpanov syndy elge eńbegi sińgen, ár salanyń maitalmanyna ainalǵan biregei qairatkerler bar. Ózim de osy mektepten bilim alyp, qalyptastym. Degenmen, elimizdegi eń iri megapolis – Almatynyń qaq ortasynda ornalasqan bul bilim ordasynyń qazirgi jaǵdaiy óte múshkil. Mektep jiyrma jyldan astam jóndeý kórmei ábden tozyǵy jetken", -dedi depýtat.
Depýtat Qasqaraýovtyń sózinshe 350 oqýshyǵa arnalǵan mektepte búginde oqýshy sany eki esege qysqartylyp, 176 bala bilim alyp jatyr. Alaida olar sport zalda uiyqtap, oqý synybynda tamaq ishýge májbúr.
Mektepke kúrdeli jóndeý júrgizý úshin úsh jyl buryn biýdjetten 503 million teńge bólinip, memlekettik satyp alý konkýrsyn «GradStroiServis» JShS utyp alǵan bolatyn. Jospar boiynsha qurylys jumystary tórt aidyń ishinde aiaqtalýy tiis edi. Biraq jaýapsyz merdiger óz mindetterin sol kúii oryndamaǵan.
"Sonda osyǵan jaýapty quzyrly mekemeler qaida qarap otyrǵan degen zańdy saýal týyndaidy?! HHI ǵasyrda, Almaty qalasynyń dál ortasyndaǵy mektepte oqýshylardyń osyndai adamtózgisiz jaǵdaiǵa túsirilgenin qalai túsinýge bolady?!" -deidi ol.
Qazirgi ýaqytta osy bilim ordasyn Almatydan Qonaev qalasyna kóshirý máselesi kóterilip jatyr eken.
Biraq bul sheshimge osy bilim oshaǵynyń túlekteri, muǵalimder men oqýshylardyń ata-analary alańdap, kóshirýge túbegeili qarsy bolyp otyr. Muny depýtat óte oryndy dep esepteidi.
"Óitkeni bul shalǵai aýyldardan kelgen qarapaiym eńbek adamdarynyń balalaryn úlken qalada, ziialy qaýymnyń ortasynda bilim alyp, zaman talabyna sai tulǵa bolyp qalyptasýyna jol ashatyn múmkindikten aiyrý bolmaq.
Sondyqtan bul tarihy tereń, ózindik dástúri bar oqý ordasyn jyly ornynan qozǵamai, kúrdeli jóndeýden ótkizip, zamanaýi oqý quraldarymen jabdyqtap, jetildire túsý kerek. Bul jerde halyqty Almatynyń ortasynda ornalasqan mekteptiń jerin alyp qoia ma degen kúmán alańdatyp otyr. Sebebi osyǵan deiin Almaty qalasyndaǵy № 2 mektep-internattyń jeri alynyp, ornyna záýlim turǵyn úiler salynǵanyn bárimiz bilemiz. Bul oqý ordasy da sonyń kúiin keshkeli otyr. Sondyqtan buǵan jol berýge bolmaidy dep esepteimiz", -deidi Daniiar Qasqaraýov.
Depýtat mektepti jóndemegen kompaniia basshylary men basqa da jaýapty mekemelerdi jan-jaqty tekserip, tiisti jaýapqa tartýdy, mektepti jóndeýden ótkizip, ony kóshirý týraly sheshimnen bas tartýdy surady.
