Dene tárbiesi sabaqtarynda ulttyq sport túrleri boiynsha mindetti komponentti engizý iske asyrylady. Bul týraly QR Mádeniet jáne sport ministri Aqtoty Raiymqulova málim etti, dep habarlaidy QazAqparat.
«Úkimettiń 2020 jylǵa arnalǵan zań jobalaý jumystary josparyna sáikes, buqaralyq sportty damytý máseleleri jónindegi keibir zańnamalyq aktilerge ózgerister men tolyqtyrýlar engizý boiynsha zańnyń jáne buqaralyq sportty damytýdyń 2020-2025 jyldarǵa arnalǵan keshendi josparynyń jobasy ázirlendi. Dene shynyqtyrý men sportty damytý, sondai-aq dene shynyqtyrý jáne sportpen shuǵyldanatyndardyń sanyn arttyrý maqsatynda birqatar is-sharalardy iske asyrý kózdelgen», - dep toqtaldy ministr Parlament Májilisindegi Úkimet saǵatynda.
Osy oraida balalar men jasóspirimderdiń dene shynyqtyrý klýbtary jáne dárigerlik-dene shynyqtyrý dispanserleriniń jelisin keńeitýdi, bilim berýdiń barlyq deńgeilerinde dene tárbiesi sabaqtarynda ulttyq sport túrleri boiynsha mindetti komponentti engizýdi iske asyrý eskerilgen.
Sonymen qatar, dene shynyqtyrý jáne sport boiynsha synyptan tys sabaqtardy júrgizgeni úshin muǵalimderge qosymsha aqy engizý, halyqpen jumys isteý úshin sport nusqaýshylaryn shtattyq birliktermen qamtamasyz etý qarastyrylǵan.
Munymen qosa, oqýshylar arasynda dene shynyqtyrý men sporty tanymal etý arqyly sporttyq jarystar sanyn arttyrý sharalary júzege asyrylmaq.
«Zań jobasy dene shynyqtyrý jáne sportpen ainalysý arqyly halyqtyń salaýytty ómir saltyna umtylysyn qalyptastyrýdy kózdeidi», - dedi A. Raiymqulova.
Taratylǵan málimetterge qaraǵanda, zań jobasyn Parlamentttiń qaraýyna 2020 jylǵy sáýir aiynda engizý josparlanyp otyr.
