Reseilik oppozitsiialyq saiasatker Aleksei Navalnyidy emdep jatqan nemis dárigerleri bolgar áriptesterinen biznesmen Emelian Gebrevtiń ýlanýy boiynsha materialdar suraǵan. Bul týraly Bellingcat-pen birigip jasaǵan zertteýge súiengen nemistiń Der Spiegel basylymy jazdy. Zertteýde derekkóz aitylmaidy.
Basylymnyń jazýynsha, Navalnyi jatqan Berlindegi "Sharite" klinikasynyń dárigerleri Gebrev pen Navalnyi bir-birine uqsas ýmen ýlanǵan degen qorytyndyǵa kelýi múmkin.
Buǵan deiin "Sharite" mamandary reseilik oppozitsionerdi ingibitor holinesteraz tobyna jatatyn zatpen ýlaýy múmkin dep habarlaǵan edi. Bul topqa organofosfattar da kiredi.
Spiegel men Bellingcat aqparatyna sáikes, nemis dárigerleri saiasatkerdiń osy orgonofosfattar tobyna jatatyn zattan ýlanýy múmkin dep topshylap otyrǵan siiaqty. Bul topqa insektitsidter, sonymen birge nerv júiesin isten shyǵaratyn toksinder (SSSR kezinde shyǵarylǵan zarin men "Novichok" ýy) de kiredi.
Emelian Gebrev Ýkrainaǵa qarý-jaraq tasymaldaýmen ainalysqan. 2015 jyly 18 sáýirde áriptesterin qabyldaý kezinde biznesmenniń jaǵdaiy kúrt nasharlap, esinen tanyp qalǵan. Dál sol kezde qalanyń ózge aýmaǵynda júrgen ulynan da sondai simptomdar baiqalǵan. Olardan jyraq júrgen kompaniia direktorynda da ýlaný belgileri paida bolǵan. Úsheýi ýlanǵanǵa deiin birneshe saǵat buryn Sofiiadaǵy kompaniia keńsesinde birge otyrǵan.
Bellingcat jáne The Insider basylymdary Gebrevtiń ýlanýyna GRÝ-dyń burynǵy ofitseri Sergei Frotovtyń qatysy bolǵan dep qorytyndy jasaǵan. Frotov Ulybritaniiada Skripaldardyń ýlanýyna qatysy bolýy múmkin reseiliktermen de bailanysty.
Navalnyi Omby aýrýhanasyna 20 tamyzda túsken. Buǵan deiin oppozitsiia jaqtastary aýrýhana dárigerlerin es-tússiz jatqan saiasatkerdi birneshe saǵat boiy nemis klinikasyna evakýatsiialaýǵa múmkindik bermedi dep kinálaǵan.
Omby dárigerleri saiasatkerde ýlaný belgileri baiqalǵanmen aǵzasynan qaýipti zat tabylmady dep málimdegen edi.
26 tamyzda ashyq hat jariialaǵan Omby dárigerleri Navalnyidy aýrýhana qyzmetkerleri qutqaryp qaldy degen tujyrymdy eshkim joqqa shyǵara almaitynyn, emdeý isine saiasattyń yqpaly bolmaǵanyn aitqan.
