Almaty qalalyq qoǵamdyq densaýlyq basqarmasy basshysy orynbasarynyń mindetin atqarýshy Laýra Myrzaǵali onlain brifingte sozylmaly aýrýy bar adamdarǵa vaktsina salýǵa bolatynyn aitty, dep habarlaidy "Ult aqparat".
Spikerdiń aitýynsha, vaktsina salýǵa qatysty qarsy kórsetilimder kóp emes.
«Sozylmaly aýrýy bar adamdar kóp, alaida olarǵa vaktsina salýǵa bolmaidy degen sóz emes. Eger aýrý asqynyp turmasa ekpe egýge ábden bolady. Tipti aýtoimmýndy aýrýlarmen aýyratyndarǵa da vaktsina salýǵa bolady. Tek munyń barlyǵyn durys jetkizip, durys túsindirip, durys aqparat berý kerek», - dedi Laýra Myrzaǵali.
Sonymen qatar, ol egý pýnkterinde vaktsinanyń úsh túri bar ekenin atap ótti. Turǵyndar ózderi qalaǵan ekpeni saldyrta alady. Atap aitsaq, qazaqstandyq «QazVac», qytaidyń «Sinopharm» jáne reseilik «Spýtnik-V».
