Tanymal qazaqstandyq biznesmen Armanjan Baitasov Ulttyq qoǵamdyq senim keńesiniń birinshi otyrysynan alǵan áserimen bólisti, dep habarlaidy "Ult aqparat".
«Ulttyq qoǵamdyq senim keńesiniń barlyq músheleri «bul jiyn qalai óter eken dep» azdap qobaljyǵan edik. Ótken aptada jumys toptarynyń birinshi otyrysy, al búgin Memleket basshysynyń qatysýymen keńestiń birinshi otyrysy ótti. Bul jańa organ bolǵandyqtan, reglamenti, bizderdiń bir-birimizben qalai ýaǵdalasatyndyǵymyz óte mańyzdy boldy. Óitkeni, keńeske 40-tan astam adam qatysty. Shyndyǵyna kelgende, sarapshylardyń deńgeii óte joǵary. Árqaisysynyń artynda úlken ujym, ne bolmasa úlken tájiribe tur. Sondyqtan barlyǵymen bir ýaǵdalastyqqa kelý óte qiyn», - dedi ol BAQ ókilderine bergen suhbatynda.
Sonymen qatar ol keńes jumysy barysynda qandai jaittyń kóńilinen shyqqanyn aityp berdi.
«Búgin maǵan ne unady? Barlyq qatysýshylar óz toptarynda óte naqty baiandama ázirlegen eken. Ózim qatysatyn ekonomikalyq máseleler jónindegi topqa qatysty aitar bolsam, biz eki baiandama jasadyq jáne naqty pikirimizdi bildirdik. Buǵan qosa, sóz sóileýshilerdiń barynsha ashyq bolǵany unady. Búgingi otyrys barysynda aitylǵan barlyq eskertpelderdi qatysýshylar, eń aldymen Prezident Ákimshiligi qaperge alaryna úmit artamyn. Kezdesýge ministrler de qatysty olar da bizdiń pikirlerimizdi qaperge alsa eken», - dedi ol.
