Shymkentte shabýyl qurbany balanyń ájesi oqiǵanyń qalai bolǵanyn aityp berdi, - dep habarlaidy Tengrinews.kz agenttigi TVK arnasyna silteme jasap.
Áleýmettik jelilerde taralǵan video kadrlarynan er adamnyń balany úidiń kireberisinde kirgizip, baspaldaq alańynda turǵanyn kórýge bolady. Sondai-aq, syrtqy beinebaqylaý kamerasyna jazylǵan video tarap jatyr. Onda bir áieldiń úige kirgenin, artynsha er adamnyń qashyp shyqqanyn kórýge bolady. Áiel bolsa er adamnyń artynan qýady. Bul oqiǵa №18 yqshamaýdanda bolǵan. Zardap shekken balanyń jasy 11-de. Onyń bul úide turmaityny tek ájesine qonaqqa kelgeni belgili boldy.
"Men ol kezde jumysta boldym, bala aýlada oinap júrgen. Bir mezette maǵan úlken ulym qońyraý soǵyp, balamdy belgisiz er adamnyń uryp-soqqanyn aitty. Sodan úi jaqqa júgirip kelsem, aýlada kórshiler jinalyp qalǵan. Politseilerdi shaqyrdyq. Olar baladan jaýap alyp jatqanda, ol tipti sóilei almai turdy, ár aitqan sózinen keiin jylai berdi", - deidi zardap shekken balanyń ájesi.
Basylymnyń málimetinshe, balaǵa shabýyldaǵan er adamnyń onda qaidan kelgenin eshkim bilmeidi. Ájesiniń aitýynsha, ol bastapqyda balany basqa bir úidiń kireberisine kirgizbek bolǵan. Alaida bala oǵan qarsylyq bildirgen soń, ony basqa bir kireberiske kirgizgen. Kórshiler balanyń aiǵaiyn estigen soń buǵan nazar aýdarǵan.
"Aýlada osy úide turatyn eki áiel otyrǵan. Sodan belgisiz er adam balamen birge úidiń kireberisine kirgen. Sondaǵy áielder onyń bul áreketine kúdiktenip, sońynan barǵan. Sol áielderge raqmet aitamyn, qutqaryp qaldy", - deidi balanyń ájesi.
Onyń aitýynsha, dárigerler balany qarap shyqty. Qazirgi ýaqytta ol týystarymen birge.
Politsiiadaǵylardyń málimetinshe, kúdikti ustaldy. Ol Shymkent qalasynyń 33 jastaǵy turǵyny bolyp shyqty. Qazir ol ýaqytsha ustaý izoliatoryna qamaldy. Bul derek Eńbekshiqazaq aýdanynyń sotqa deiingi biryńǵai tergeý reestrine tirkeldi.
