Máskeý ortalyq klinikalyq aýrýhanasynda 92 jasqa qaraǵan shaǵynda Sovet odaǵy ortalyq komitetiniń sońǵy bas hatshysy Mihail Gorbachev qaitys boldy.
Resei aqparat quraldary Gorbachevtiń "sozylmaly aýrýdan kóz jumǵanyn" jazdy.
Ol Máskeýdiń Novodeviche ziratynda, áieli Raisa Maksimovnanyń (1999 jyly qaitys bolǵan) janyna jerlenedi.
Azattyq radiosynyń habarlaýynsha, álemniń túkpir-túkpirinde burynǵy saiasatkerdiń týystaryna kóńil aityp jatyr.
BUU bas hatshysy Antoniý Gýterrish Gorbachev "tarih baǵytyn ózgertken" tulǵa dep málimdedi.
Eýropa komissiiasynyń prezidenti Ýrsýla von der Liaien Gorbachevtiń "murasy eshqashan umytylmaidy" dedi. Ol "qurmet pen senimge ie basshy boldy" jáne "qyrǵi-qabaq soǵysty aiaqtaý jáne temir perdeni buzýda mańyzdy ról atqaryp, erkin Eýropaǵa jol ashty" dedi ol.
Mihail Gorbachiov 1931 jylǵy 2 naýryzda Reseidiń Stavropol ólkesi Privolnoe aýylynda dúniege kelgen. Mektepti kúmis medalmen aiaqtap, 19 jasynda Máskeý memlekettik ýniversitetiniń zań fakýltetine oqýǵa túsken. Ekinshi kýrsta Sovet odaǵy kommýnistik partiiasyna qabyldanǵan.
Oqýyn támamdaǵan soń Stavropolge jiberilgen. Sol jerde partiiadaǵy saiasi mansabyn bastaǵan. 1970 jyly Sovet odaǵy Joǵarǵy keńesiniń depýtaty atansa, 1978 jyly komýnistik partiia ortalyq komitetiniń hatshysy bolyp sailanyp, otbasymen Máskeýge kóshken. Gorbachevtiń óziniń aitýynsha, qyzmette úlken qarqynmen ósýine Sovet odaǵy memlekettik qaýipsizdik komitetiniń basshysy Iýrii Andropov yqpal etken.
1980 jyly qazanda partiia ortalyq komiteti saiasi biýrosynyń múshesi boldy.
Mihail Gorbachev Kompartiia bas hatshysy Konstantin Chernenko qaitys bolǵan soń, 1985 jylǵy 11 naýryzda jańa bas hatshy bolyp sailanǵan. Kóp keshikpei "jariialylyq" saiasatyn jariialap, onyń sońy birneshe jyldan soń is júzinde sóz bostandyǵyna jeteledi, keiin parlamentarizm paida bolyp, SSSR qulady.
Halyqaralyq arenada Gorbachev iadrolyq qarýdy azaitý jáne AQSh, NATO-men jaǵdaidy ýshyqtyrmaý saiasatyn qoldady. Gorbachev qolǵa alǵan qaita qurý saiasaty Shyǵys jáne Ortalyq Eýropada sovet rejimderin qulaýǵa itermeledi. Bul Mihail Gorbachevti álemdegi eń tanymal adam etti. 1990 jyly Gorbachev Beibitshilik jónindegi Nobel syilyǵynyń laýreaty atandy.
1990 jyly Gorbachev SSSR prezidenti bolyp sailandy. Bul – jańa qyzmet. Buǵan deiin eldi Joǵarǵy keńes prezidiýmy tóraǵasy basqaryp kelgen.
1991 jyly tamyzda reaktsionerler toby Sovet odaǵyn saqtaý úshin memlekettik tóńkeris jasaýǵa árekettengenmen nátijesiz aiaqtaldy.
Gorbachev 1991 jyly jeltoqsanda prezident ókiletinen bas tartty. Ol kezde táýelsizdikterin jariialap qoiǵan Resei, Ýkraina jáne Belarýs SSSR-di joiý týraly Belovej kelisimine qol qoiǵan.
Saiasattan ketkennen keiin Mihail Sergeevich Resei jáne álem tarihynyń máselelerin zertteýmen ainalysatyn "Gorbachev-qoryn" qurdy. 1996 jyly Gorbachev Reseidegi prezident sailaýyna qatysqanmen 0,51% daýys jinady.
