Ishki ister ministriniń orynbasary Arystanǵani Zapparov eldegi qylmystyq atqarý júiesi qalai jańǵyrtylyp jatqanyn aitty, dep habarlaidy QazAqparat.
«Sottalǵandardy qashyqtyqtan baqylaý úshin planshetter men elektrondy bilezikter engiziletinin kópten beri aityp júrmiz. Bul esepke alynǵan azamattardyń probatsiia qyzmetiniń qyzmetkerlerimen fizikalyq bailanystaryn barynsha azaitýǵa múmkindik beredi jáne olardyń belgilei ornyna kelip-ketý shyǵyndaryn únemdeidi», - dedi Arystanǵani Zapparov adam quqyqtary jónindegi komissiianyń otyrysynda.
Ministrdiń orynbasary túrme infraqurylymyn jańǵyrtý, qylmystyq-atqarý júiesi mekemelerin beinebaqylaý júielerimen jaraqtandyrý, sondai-aq jazasyn ótep jatqan adamdardy meditsinalyq qamtamasyz etý máseleleri týraly da aitty.
«Sottalǵandardy ustaý jaǵdaiyn halyqaralyq standarttarǵa sáikes keltirý, qylmystyq jazalardyń oryndalýyn reformalaý, azaptaý faktilerin boldyrmaý – ishki ister organdarynyń aldynda turǵan basty mindetterdiń biri. Sońǵy jyldary sottalǵandardyń tamaqtaný ratsiony qaita qaraldy. Irimshik, qaimaq, shujyq ónimderi, shyryndar, jańa pisken jemistermen tolyqtyrylyp, et, balyq, sút jáne súzbe berý 1,5 esege artty», - dedi ministrdiń orynbasary.
Onyń aitýynsha, biyl Úkimet qaýlysy boiynsha ár sottalǵan adamnyń tamaqtaný normasy táýligine 40%-ǵa (630-dan 1018 teńgege deiin) ulǵaitylypty. Abaqtydaǵy azamattardyń azyq-túlik pen qajetti taýarlardy satyp alýy úshin «elektrondyq dúkender» engizilip jatyr.
«Sálemdemelerdiń salmaǵy 14-ten 20 kelige deiin ulǵaityldy. Ózimen birge alyp júrýge, sálemdeme men banderol kúiinde alýǵa jáne mekeme janyndaǵy dúkenderde satyp alýǵa ruqsat etiletin zattardyń tizbesi keńeitildi. Barlyq mekemelerde Bas prokýratýraǵa jáne basqa da memlekettik organdarǵa shaǵym berý úshin 121 elektrondyq terminal ornatylǵan. Biyl taǵy 122 terminal satyp alý josparlanyp otyr», - deidi Arystanǵani Zapparov.
Ishki ister ministrliginiń ókili eldegi qylmystyq atqarý júiesinde 65 meditsinalyq bólim, 15 meditsinalyq pýnkt, eki somatikalyq, úsh týberkýlezge qarsy jáne bir psihiatriialyq aýrýhana bar ekenin atap ótti. Ótken jyly 5,6 myńnan astam naýqas konsýltatsiialyq-diagnostikalyq kómek alsa, 400-ge jýyq hirýrgiialyq operatsiia sátti júrgizilgen.
Búgingi tańda respýblikanyń 80 penitentsiarlyq mekemelerinde 1,7 myńnan astam áiel, 716 múgedek jáne 47 kámeletke tolmaǵan jasóspirim jazasyn ótep jatyr.
