Búginde sottalǵandardyń azyq-túlik, kiim-keshek, kitap satyp alý múmkindigi bar. Bul týraly Ishki ister ministrliginiń baspasóz qyzmeti ótkizgen onlain brifingte aityldy, dep habarlaidy QazAqparat.
Ótken aptada QR IIM basshysy Erlan Turǵymbaev senatorlarmen birge eldiń penitentsiarlyq júiesin damytý máselesin talqylaǵan bolatyn.
«Erlan Turǵymbaev qylmystyq-atqarý júiesin damytý, qamaýda ustaý oryndarynyń infraqurylymyn jańǵyrtý, sottalǵandardy jumysqa ornalastyrý, olarǵa meditsinalyq qyzmet kórsetý, sondai-aq mekemelerdi beinebaqylaýmen jaraqtandyrý týraly baiandady», - deidi QR IIM resmi ókili Nurdildá Oraz.
Onyń aitýynsha, vedomstvo basshysy qabyldanyp jatqan sharalar sottalǵandardy ustaýdy aitarlyqtai jaqsartatynyn jáne jazalardy oryndaý júiesin izgilendirý úshin quqyqtyq jaǵdailardy qamtamasyz etetinin atap ótken.
«Búginde sottalǵandardyń azyq-túlik, kiim-keshek, kitap satyp alý múmkindigi bar. Áleýmettik paidaly bailanystardy qoldaý úshin sottalǵandardyń týystarymen beinesóilesý engiziledi. Sálemdemelerdiń salmaǵy, sondai-aq tamaqtaný normalary artty», - dedi Ishki ister ministri Erlan Turǵymbaev talqylaý barysynda.
