Ishki ister ministri Erlan Turǵymbaev sottalǵandardy meditsinalyq qyzmetpen qamtamasyz etý fýnktsiiasy nege Densaýlyq saqtaý ministrligine beriletinin túsindirdi, dep habarlaidy QazAqparat.
Bul jóninde vedomstvonyń aqparat alańynda Ishki ister ministrliginiń baspasóz ókili Shuǵyla Turlybek aitty.
«Erlan Turǵymbaev sottalǵandardy meditsinalyq qamtamasyz etý fýnktsiiasyn Densaýlyq saqtaý ministrliginiń qaramaǵyna berý týraly habarlady», - dedi ministrlik ókili.
Ministrdiń ózi muny sottalǵandardy ustaý oryndaryndaǵy zańsyzdyqtardy búrkemeleýge jol bermeitin qadam dep baǵalap otyr.
«Bul tekserý diagnostika jáne emdeýdiń zamanaýi ádisterine neǵurlym qol jetkizýge múmkindik beredi jáne meditsina qyzmetkererine mekemelerdiń ákimshiliginen táýelsiz qyzmet etetin bolady. Bul óz kezeginde zańsyz áreketterdiń yqtimal faktilerin jasyrýdy joiady», - dedi ministr.
Baspasóz ókiliniń aitýynsha, Ishki ister ministrligi sottalǵandardy turǵylyqty jeri boiynsha koloniiaǵa aýystyrý rásimin zań aiasynda jeńildetken.
«Dári-dármekke qatysty shekteýler joiyldy. Naýqastaný boiynsha bosatý týraly ótinishterdi qaraý merzimi qysqartyldy. Ótinishterdi elektrondy túrde jiberý quqyǵy berildi. Ustaý jaǵdailaryn jaqsartý bóliginde biyl aqpan aiynda sottalǵandardyń tamaqtaný normalary - 40 paiyzǵa, sálemdeme men saýqattardyń ruqsat etilgen salmaǵy úshten birge artty. Ózimen birge alyp júretin sálemdemelerdiń jáne satyp alýǵa ruqsat etetin zattardyń tizbesi keńeitildi. Ótken jyldan bastap koloniialarda elektrondyq dúkender engizile bastady. Sondai-aq, kezdesýler sany artty», - dedi Shuǵyla Turlybek.
Vedomstvo ókiliniń aitýynsha, jumysqa ornalastyrylǵan sottalǵandardyń sany byltyrdan beri 38 paiyzdan 49 paiyzǵa deiin artqan.
