Qylmystyq-atqarý júiesi mekemelerinde sottalǵandarǵa advokattarmen (qorǵaýshylarmen) kezdesýge ruqsat etildi. Bul týraly QR bas sanitarlyq dárigeriniń jańa qaýlysynda aitylǵan, dep habarlaidy "Ult aqparat".
Qujatqa sáikes, advokatpen (qorǵaýshymen), sondai-aq shuǵyl tergeý áreketterin júrgizý úshin tergeýshimen jáne advokatpen (qorǵaýshyǵa) kórisýge ruqsat berildi. Bul rette, maska nemese respiratordyń, rezeńke qolǵaptardyń bolýy mindetti. Sondai-aq tergeý áreketterine qatysýshylar arasynda keminde 2 metr qashyqtyq saqtalýy tiis. Sottalǵandardyń, kúdiktilerdiń jáne aiyptalýshylardyń qatysýymen júrgiziletin ózge is-sharalarǵa shekteý joiylǵan joq.
Eske sala keteiik, buǵan deiin sottalǵandardyń advokattarmen (qorǵaýshylarmen) kezdesýi toqtatylǵan bolatyn. Shuǵyl tergeý áreketterin júrgizý úshin tergeýshimen jáne advokatpen kezdesýge ǵana ruqsat beriletin.
Sonymen qatar, týystarmen uzaqmerzimdi kezdesýlerge ruqsat berildi. Bul jaǵdaida merzimi 5 táýlikten aspaǵan koronavirýsqa PTR-anyqtama bolýy shart. Vaktsinanyń tolyq kýrsyn alǵandardan PTR-anyqtama talap etilmeidi. Alaida, koronavirýsqa qarsy egilgenin rastaityn qujat usynylýy qajet.
Sondai-aq jańa qaýlyǵa sáikes, Qazaqstanǵa Údistannan kelgen azamattardy 14 kúnge úide oqshaýlaý kerektigi aitylǵan.
PTR-testiń 3 táýlikten aspaityn teris nátijesi bar anyqtama nemese COVID-19-ǵa qarsy vaktsinanyń tolyq kýrsyn alǵanyn rastaityn qujat usynylǵan jaǵdaida, bosaný kezinde seriktes bolýǵa ruqsat berildi.
