Almatyda qylmystyq ister boiynsha mamandandyrylǵan aýdanaralyq sotynda Rahman Omarovtyń birinshi áieli Gúlderaiym Omarovanyń ólimine qatysty sot boiynsha aldyn ala tyńdalyp ótti, dep habarlaidy QazAqparat tilshisi.
Otyrys barysynda memlekettik aiyptaýshy aiyptaý aktisin oqydy.
"25-maýsymda túski 14.00 shamasynda Gúlderaiym Omarova jalǵa beretin páterine páteraqysyn (99 myń teńge) alýǵa kelgen. Sol sátte úide sottalýshy Aqtolqyn Súleimenova bolǵan. Ekeýiniń arasynda biraz ýaqyttan soń urys-keris bastalady. Sonyń kesirinen Súleimenova as úi pyshaǵyn ala júgirip, Omarovanyń moinynyń bir jaq búiirinen, aldyńǵy tusynan birneshe ret pyshaq urǵan. Kóp uzamai áieldiń qimylsyz qalǵanyn kórgen kúdikti deneni balkonǵa alyp shyǵyp, marqumnyń basyn paketke orap qoiǵan. Úidegi qan izderin shúberekpen, salfetkamen súrtýge kirisken. Sol kúni keshki 18:00 shamasynda marqumnyń balasy Kákimov Doshan sol páterge anasyn izdep kelip, esikti uzaq qaqqan. Súleimenova oǵan anasynyń ketip qalǵanyn aitqan. Alaida er adam oǵan senbei úidiń ár bólmesin qarap shyqpaq bolady. Kóp uzamai Kákimov anasynyń qanǵa bókken denesin kórip, syrtqa qashýǵa árekettengen. Alaida Súleimenova qylmysyn jasyrý maqsatynda ony da óltirmek oimen pyshaq ala júgirgen. Eki aradaǵy kikiljiń barysynda áieldiń qolyndaǵy pyshaq Kákimovtyń saýsaǵyn kesip ketken. Abyroi bolǵanda, er adam páterden sytylyp shyǵa alǵan. Osylaisha Súleimenova Aqtolqyn QR QK 99-babynyń 1-bólimimen, 24-babynyń 3-bólimimen, 99-babynyń 2-bólimimen qarastyrylǵan qylmys jasady dep aiyptalyp otyr", - dedi prokýror Ermek Qashaǵanov.
Al sottalýshynyń advokaty Ýmarov qylmystyq isti prokýrorǵa qaitarýdy surady. Onyń pikirinshe, aiyptaý aktisinde jazany jumsartý máseleleri qarastyrylmaǵan.
"Súleimenova óziniń kinásin tolyq moiyndap, istegenine ókinip otyr. Ol Omarovanyń balasyn óltirgisi kelmegen. 24-baptyń 3-bólimi negizsiz qosylyp otyr. Alyp tastaýyńyzdy suraimyn. QR QK 99-babynyń 1-tarmaǵyn QR QK 106-babyna aýystyrýdy suraimyn. Iaǵni, meniń qorǵaýymdaǵy áiel Omarovany óltirgisi kelmegen. Ol Omarovanyń densaýlyǵyna qasaqana ziian keltirdi. Biraq ádeii óltirgisi kelgen joq", - dedi advokat Ýmarov.
Alaida sýdia Ýmarovtyń ótinishin qanaǵattandyrmady. Basty sot otyrysy 5 qarashada 15.00-de ótetin boldy.
Sotqa jábirlenýshi retinde marqumnyń ápkesi men uly Doshan Kákimov qatysyp otyr.
Qaiǵyly oqiǵa 2018 jyldyń 25 maýsymynda bolǵan edi.
Gúlderaiym Omarova Aqkent shaǵynaýdanyndaǵy páterin jalǵa berip kelgen. Maýsymnyń 26 kúni ol jalǵa alý aqysyn alý úshin páter jaldaýshylaryna barǵan.
Sol kezde páter qojaiyny men jaldaýshylar arasynda urys paida bolǵan.
Daý-damaidyń arty qaiǵyly jaǵdaiǵa ulasty.
