Denis Tenniń ólimine kúdikti dep tanylǵan Arman Qudaibergenov búgin sotta jaýap berip, marqumnyń týǵan-týystarynan keshirim surady, dep habarlaidy Baq.kz agenttigi.
«Bizdiń adam óltiremiz degen oiymyz bolmady. Basty maqsatymyz – aqsha tabý edi. Buǵan deiin isti bolǵandyqtan jumysqa tura almadym. Sondyqtan aina urlaýǵa bardym», - dedi A. Qudaibergenov.
Sondai-aq ol Nuraly Qiiasovpen 2017 jyldyń qysynan beri tanys ekenin, al Janar Tolybaevamen ótken jyldyń 29 sáýirinde tanysqanyn jetkizdi.
«18 shilde kúni tańnan beri bárimiz birge júrdik. Oǵan deiin Shańyraq-2 yqshamaýdanynda Nuralynyń aǵasy Sultannyń úiinde boldyq. 18 kúni tańerteń Nuralydan aiaǵym aýyr dep onyń qyzy kelip shý shyǵardy. Sodan Nuraly aǵasymen ursysyp qalǵan soń 18 kúni keshke bir táýlikke páter jaldap, bólek kettik», - dedi kúdikti.
Sonymen qatar ol, aqshadan qatty qysylǵandyqtaryn jáne sol kúni keshke tanstaryn kezdestirip qalamyz ba degen oimen «Angar» kafesine barǵandaryn, odan shyǵyp kóshede taksi bolǵandaryn aityp berdi.
«Páterdiń janyna kelgen soń dúkennen 4 shólmek syra alyp kólikte ishtik. Sol jerde Nuralynyń aqshadan qatty qinalyp otyrǵanyn kórip, oǵan aqsha tabý jolyn usynyp, problemasyn solai sheshýge bolatynyn aittym. Kóliktiń ainasyn sheship alýdy biletinmin, ony internetten de qarap kórgenmin», - deidi ol.
Kúdiktiniń málimetinshe, olar 19 shilde kúni páter kiltin tabystaǵan soń kólikpen qalaǵa shyqqan.
«Janar kóliktiń artynda telefon shuqylap otyrdy, ol bizdiń urlyqqa baratynymyzdy bilmedi. Qurmanǵazy kóshesi boiymen ketip bara jatqanda birneshe qymbat kólikti kórdik. Aq tústi kóliktiń ainasyn sheship alyp, endi ketip bara jatqanymda aldymnan Denis Ten shyǵyp qaldy. Men oǵan ainany ustata salyp qasha jóneldim. Buǵan deiin Astanada isti bolǵanmyn, endi mynaý bolsa jaǵdaiym ushyǵyp ketedi dep qoryqtym. Sol sebepti qashý kerek boldy», - dedi ol.
Onyń aitýynsha, Denis qýyp jetip ekeýi tóbelesken, alaida oǵan shamasy jetpegen soń beldigin sermep, ony jasqamaq bolǵan.
«Ol meni joǵary jaǵymnan urǵan kezde eseńgirep qaldym. Esimdi jiyp qarasam Nuraly janymda tur. Denis te shok kúiinde boldy. Bári jyldam, 5-6 sekýndta boldy. Biz qasha jóneldik, qarasam Nuraly pyshaqty laqtyryp jatyr. Nege laqtyrdyń dep suraǵanymda ol eki ret suqqanyn aitty. Qýystar arqyly qashyp, kólikke baryp, Janardy alyp Sairan jaqqa bardyq. Ol ólmeitin shyǵar dep oiladyq. Keiin Denis Tenniń ólgenin internet klýbtan bildik», - dedi ol.
Sondai-aq ol, quqyq qorǵaý organdarynyń moiynda dep qysym kórsetkeninen soń Denisti óltirdim dep moiyndaǵanyn jetkizdi.
