Qaraǵandy soty burynǵy Premer-ministr Serik Ahmetovtiń bas bostandyǵyn shekteý jazasynan shartty túrde bosatý týraly ótinishin qanaǵattandyrmady. Eki jyl buryn Ahmetovtiń túrme jazasy bas bostandyǵyn shekteý jazasymen almastyrylǵan edi.
Burynǵy sheneýnik sot sheshimimen kelisken joq, biraq pikirin aitpady. Onyń jazadan tolyq bosatý týraly ótinishin qylmystyq ister jónindegi Qazybek aýdandyq sotynyń sýdiasy Manat Jumaqaeva qarady.
Prokýror Ásem Tergeýbekova búgin tańerteń sotta "onyń tolyq túzelip shyqqanyn dáleldeitin qajetti derek joq" dep Ahmetovtiń ótinishin qanaǵattandyrmaýdy suraǵan edi. Al qorǵaý taraby Ahmetovtiń shyǵyndy tolyq ótegenin, merziminen buryn bosap shyǵýǵa qajetti barlyq sharttar oryndalǵanyn aitqan.
Búgin sot otyrysynyń basynda Serik Ahmetov jýrnalisterge jyly shyrai tanytyp, sot otyrysy barysynda qaljyń da aityp qaldy. Biraq sot úkimi shyqqan soń pikir aitpai, sot zalynan shyǵýǵa asyqty. Kóshede ony kólik kútip turdy. Ol sotqa jýrnalisterdiń qatysýyna qarsy bolǵan joq. Ahmetovti qoldaý úshin otyrysqa onyń týysy da qatysty. Jýrnalisterdiń "internet qoldanýshylardyń pikirin oqisyz ba?" degen suraǵyna Ahmetov "únemi oqi bermeimin" dep jaýap berdi.
Qazaqstannyń burynǵy Premer-ministri jáne eldiń burynǵy Qorǵanys ministri Serik Ahmetov 2015 jylǵy jeltoqsanda "zańsyz kásipkerlikpen ainalysty" jáne "ókiletin asyra qoldandy" dep aiyptalyp, 10 jylǵa sottalǵan. Ahmetov sot barysynda ózine taǵylǵan aiyptardy joqqa shyǵarǵan. Sot onyń dúnie-múlkin tárkilep, bes jyl memlekettik qyzmetpen ainalysýyna tyiym salǵan.
2016 jyly naýryzda apelliatsiialyq instantsiia Serik Ahmetovtiń jazasyn 10 jyldan 8 jylǵa azaitqan. 2017 jyly qańtar aiynda onyń jazasynyń ótelmegen merziminiń tórtten biri Qazaqstan táýelsizdiginiń 25 jyldyǵyna orai jariialanǵan raqymshylyq boiynsha azaitylǵan.
Túrme jazasy bas bostandyǵyn shekteý jazasymen almastyrylǵan Serik Ahmetov eki jylǵa jýyq túrmede qamaýda otyryp, 2017 jyly 21 qyrkúiekte bostandyqqa shyqty.
2015 jyly onymen birge birqatar joǵary laýazymdy qyzmet atqarǵan sheneýnikter de sottaldy. Bul is boiynsha negizgi aiyptalýshylar túrme jazasyn aldy, biraq keiinirek jazasy jumsartyldy.
