2021 jyly aliment tólemegeni úshin 316 boryshker qylmystyq jaýapkershilikke tartyldy. Bul týraly búgin Májilistegi Úkimet saǵatynda Ádilet ministri Qanat Mýsin aitty, dep habarlaidy QazAqparat tilshisi.
«Ministrlik boryshkerlerdiń de, óndirip alýshylardyń da quqyqtaryn qorǵaý úshin júieli jumys júrgizýde. «Atqarýshylyq is júrgizý týraly» Zańǵa 2020 jyly mańyzdy ózgerister engizildi. Olar boryshker men óndirip alýshynyń quqyqtaryn qorǵaýǵa, jeke sot oryndaýshynyń jaýapkershiligin kúsheitýge baǵyttalǵan. Endi bir ai ishinde aliment óndirý jáne basqa da áleýmettik ister boiynsha belsendi jumys bolmaǵan jaǵdaida sot oryndaýshysy litsenziiasynan aiyrylady. 2021 jyly osyndai negizder boiynsha 19 jeke sot oryndaýshysy litsenziiasynan aiyryldy», - dedi ol.
Ministrdiń aitýynsha, jeke sot oryndaýshy múlikti satqannan keiin basqa sot oryndaýshylardyń da shekteýlerin sheshýge mindetti boldy. Sonymen qatar endi sot oryndaýshysy boryshkerdiń elden shyǵýyn shekteýge mindetti. Buryn ol muny óz qalaýy boiynsha jasai alatyn.
«Jumys isteitin múgedek boryshkerden aliment óndirip alý tek onyń jalaqysynan ǵana júzege asyrylady. 2020 jylǵy jeltoqsanda Joǵarǵy sottyń «Sot aktilerin oryndamaǵany úshin jaýaptylyq týraly« normativtik qaýlysyna túzetýler engizildi. Bul ózgerister qasaqana tólemeýshilerdi qylmystyq jaýapkershilikke tartýdy aitarlyqtai jeńildetti. Ótken jyly aliment tólemegeni úshin 316 boryshker qylmystyq jaýapkershilikke tartyldy. Al 2019 jyly 62 boryshker jaýapqa tartylǵan edi. 2021 jyly 6 myńnan astam boryshker ákimshilik jaýapkershilikke tartylyp otyr», - dedi Qanat Mýsin.
