Sot oryndaýshylar boryshkerlermen betpe-bet jumys júrgizgen jaǵdaida árbir áreketin videoǵa túsirý qolǵa alynbaq. Bul týraly QR Ádilet ministri Marat Beketaev ortalyq kommýnikatsiialar qyzmetinde ótip jatqan brifingide aitty, dep habarlaidy QazAqparat.
Brifing barysynda ministr jyl boiynda engizilgen jańashyl jobalarǵa toqtaldy.
«Azamattyq hal-ahýal aktilerin tirkeýdiń elektrondy arhivi aiasynda zańnamaǵa túzetý engizý týraly bastama engizdik. Budan bylai eks-aýmaqtyq qaǵidat engizilmek. Iaǵni, buryn AHAJ-da tirkelý úshin turǵylyqty mekenjai boiynsha júginý kerek bolsa, qazir Qazaqstannyń kez kelgen qalasyndaǵy AHAJ qujatyn halyqqa qyzmet kórsetý ortalyǵynda rásimdeýge bolady. AHAJ qujattaryn alý merzimi 30 kúnnen 3 kúnge deiin qysqaryp otyr», - dedi Ádilet ministri.
Onyń málimeti boiynsha, sot oryndaýshylardyń qyzmetin tsifrlandyrý boiynsha atqaryp jatqan sharalar atqarý óndirisiniń aqparattyq júiesi arqyly iske asady.
«Bul júie 2017 jyldan beri Jeke sot oryndaýshylar palatasynyń senimgerlik basqarýynda. Bul júieni damytý jáne jumysyn súiemeldeý shyǵyndarynyń bárin sol palata kóteredi. Júie sot oryndaýshylardyń halyqpen jumysyn internet arqyly retteýge baǵyttalǵan. Azamattar óziniń atyndaǵy shekteýler týraly málimetti sot oryndaýshysyna barmai-aq bile alady. Sondai-aq, búkil qaryzdy onlain rejimde tóleýge bolady. Mundai jaǵdaida qaryzǵa qatysty shekteýlerdiń bári 30 minýt ishinde alynady», - dedi vedomstvo basshysy.
Sondai-aq, ol sot oryndaýshylardyń jaýapkershiligin arttyratyn ózgerister týraly málimet berdi.
«Sot oryndaýshylar boryshkerlermen betpe-bet júmys júrgizgen kezdegi áreketterin videomen tirkeý josparlanyp otyr. Bul fýnktsional qazir pysyqtalyp jatyr. Sonyń arqasynda sot oryndaýshylardyń qyzmetin áldeqaida ashyq ete túsemiz. Basqa da qujattar neǵurlym jyldam ázirlenedi jáne aqparat júiesine ýaqtyly júktelip otyrady», - dedi Marat Beketaev.
