Mahambet Ábjan / Foto: informburo.kz
Jýrnalist Mahambet Ábjanǵa qatysty úkim zańdy kúshine endi, dep habarlaidy Astana qalasy sotynyń baspasóz qyzmeti.
Buǵan deiin habarlanǵandai, 2023 jylǵy 3 aqpanda Astana qalasynyń qylmystyq ister jónindegi mamandandyrylǵan aýdanaralyq soty Mahambet Ábjanǵa BAQ-ty paidalanyp, iri zalal keltirýge ákep soqqan kórineý jalǵan aqparat taratý (QK-niń 274-baby 3-bóligi) jáne asa iri mólsherde bopsalaý faktileri boiynsha (QK-niń 194-baby 4-bóligi 2) tarmaǵy) úkim shyǵardy.
Ábjan qylmystardyń jiyntyǵy boiynsha 9 jylǵa bas bostandyǵynan aiyrý jazasyna kesildi. Ol jazasyn tótenshe qaýipsiz qylmystyq-atqarý júiesi mekemesinde óteidi.
Jýrnalistiń is-áreketinen qaýipti qylmystyń qaitalanǵany anyqtalǵan.
"Sottalǵan adam men onyń qorǵaýshylary osy úkimmen kelispei, sot aktisine apelliatsiialyq tártippen shaǵymdanyp, Ábjandy aqtaýdy surady. Sot aktisiniń kúshin joiýǵa nemese ózgertýge negiz bolmaǵandyqtan, úkim ózgerissiz qaldyryldy jáne zańdy kúshine endi", - dep málimdedi qalalyq sot.
Eske sala keteiik, sot anyqtaǵandai, Mahambet Ábjan "Abzhan news" telegramm-kanalynyń iesi jáne avtory bolǵan kezde, 2022 jylǵy maýsymnan shildege deiin BAQ-ty paidalana otyryp, "Astana-óńirlik elektrjelilik kompaniiasy" AQ basqarma tóraǵasynyń orynbasary G.Qojabaevqa, "Astana Jylý tranziti" basqarma tóraǵasynyń orynbasary K.Mýkinge jáne Rashit Mahatqa (jeke kásipker) qatysty kórineý jalǵan málimetter jariialaǵan.
Sondai-aq, ol Rashit Mahattan 50 mln teńge aqsha bopsalaǵan.
