Foto: © uralskweek.kz
13 sáýirde qylmystyq ister jónindegi mamandandyrylǵan aýdanaralyq sotynda 32 jastaǵy Rýslan Qojantaev pen 22 jastaǵy Turlan Amangeldige qatysty úkim shyqty, - dep habarlaidy Tengrinews.kz saity "Moi gorodqa" silteme jasap.
"Sot úkim etti: Rýslan Qojantaev QK 99-baby, 2-bóligi 5-7 tarmaqtary boiynsha kináli dep tabylsyn jáne oǵan 15 jyl merzimge bas bostandyǵynan aiyrý jazasy taǵaiyndalsyn. Turlan Amangeldi QK 99-baby, 2-bóligi 5-7 tarmaqtary boiynsha kináli dep tabylsyn jáne 15 jylǵa bas bostandyǵynan aiyrý jazasy taǵaiyndalsyn", - dedi úkimdi oqyǵan sýdia.
Buǵan deiin Qylmystyq ister jónindegi mamandandyrylǵan aýdanaralyq sotta byltyr tamyzda eldi dúr silkindirgen oraldyq kásipker Erkin Muhanǵalievtiń ólimine qatysty sot otyrysy aiaqtalǵanyn habarlaǵan edik.
Sońǵy sózin sóilegen sottalýshy Rýslan Qojantaev marqum restoratordyń týystarynan keshirim surady.
"Men kinámdi moiyndaimyn, biraq aldyn ala sóz bailasý boldy jáne kisi óltirý erekshe qatygezdik boldy degenge kelispeimin. Maǵan prokýror men tergeýshiniń teksergeni úshin emes, naqty istegen isim úshin jaza taǵaiyndaýyńyzdy suraimyn", - dedi ol.
Ekinshi sottalýshy Turlan Amangeldi de jábirlenýshilerden keshirim surady.
"Qazylar alqasy ádil sheshim shyǵarady dep senemin. Men Muhanǵalievti óltirmedim. Barlyǵynan keshirim suraimyn", - dedi sottalýshy qysqasha.
Eske salaiyq, oqiǵa 6 tamyzda keshke bolǵan edi. Erkin Muhanǵalievtiń máiiti P.Atoian atyndaǵy stadion turaǵynan tabylǵan. Sonymen qatar, kásipkerge kafede shabýyl jasalǵany belgili boldy.
Keiinirek kúdiktilerdiń jeke basy anyqtaldy, olar - kisi óltirgennen keiin oqiǵa ornynan qashyp ketken 31 jastaǵy Rýslan Qojantaev pen 21 jastaǵy Turlan Amangeldi.
Politseiler Oraldan shyǵatyn jáne kiretin joldardy teksergen, kúdiktiler barýy múmkin degen jerler tekserilgen. Qylmyskerlerdi ustaýǵa kúsh qurylymdary jumyldyrylǵan.
Artynsha oraldyq kásipkerdi óltirgen sáttiń videosy tarady. Beinejazbada kásipkerdiń eki jigitpen dámhanada qalai sóilesip jatqany kórsetilgen. Kenet janjal bastalyp, jigitterdiń biri kásipkerdiń moiyn tusyna pyshaq suǵyp alǵan. Sodan keiin ol taǵy birneshe ret urady. Jaraqat alǵan Muhanǵaliev terezeden shyǵyp úlgeredi, biraq olar qýyp jetip, kóshede taǵy 15 ret pyshaqtaǵan. Kásipker jedel járdem kelgenshe, qaitys bolǵan. Keiin bul is boiynsha kúdiktiler ustalǵany habarlandy.
