Sot Erlan Bilálǵa «Qazaqstannyń eńbek sińirgen qairatkeri» ataǵyn qaitaryp berdi. Biraq ártis sot mindettegen qomaqty aiyppuldy áli tólep bitirgen joq. Al «Sezam» teatrynyń direktory apelliatsiialyq sotqa qaita shaǵym túsirip, moraldyq shyǵyn retinde Erlan Biláldan bir million teńge óndirip berýdi talap etken, dep habarlaidy "Ult aqparat" Almaty telearnasyna silteme jasap.
Apelliatsiialyq sotqa bul joly da Erlan Bilál jaýapker retinde kelgen. «Sezam» teatrynyń direktory Qairat Baianov sottan Erlannan moraldik shyǵyn retinde bir million teńge óndirip berýdi talap etken.
Baianov shaǵymdy ózi emes, advokaty jazǵanyn aitsa da, bir million teńge óndirýdiń sebebin aqyry sýdiaǵa túsindirip, dáleldep bere almady. Prokýrorda «Sezam» teatrynyń direktorynyń shaǵymyn qaraýsyz, burynǵy úkimdi kúshinde qaldyrýdy qoldady. Moraldyq shyǵyn óteýden qutylǵan soń ártis óziniń ataǵyn qaitaryp berý týraly ótinishin de sýdiaǵa jetkizip úlgerdi.
Sýdia Bektemirova «Qurmet ordenin» qaitarý ótinishin qaraýsyz qaldyrsa da, Erlanǵa «Qazaqstanyń eńbek sińirgen qairatkeri» ataǵyn qaitaryp berdi.
«Bolǵan oqiǵaǵa ataq-dárejeniń esh qatysy joq. Óitkeni men shyǵarmashylyq adam retinde sol Qazaqstannyń eńbek sińirgen qairatkeri ataǵyn alǵan bolatynmyn. Oinaǵan rólderim úshin, akter retinde. Sol ataǵyma ádiletti sheshim qabyldap, sottyń sheshim qaldyrǵanyna úlken alǵysymdy bildiremin. Bárine táýbe dep qaraityn halyqpyz ǵoi. "Er jigittiń moinynda qyl arqan shirimes". Kóteremiz shama-sharqymyz kelgenshe», - dedi Qazaqstannyń eńbek sińirgen qairatkeri, ártis Erlan BILÁL.
Este bolsa, aqpannyń 7-sinde Almatynyń Almaly aýdandyq soty Áýezov atyndaǵy Qazaq memlekettik akademiialyq drama teatrynyń burynǵy direktoryna «para alýǵa árekettený» aiybyn taǵyp, oǵan 52 million 500 myń teńge aiyppul salǵan edi. Bir ǵana jalaqyǵa qarap otyrǵan ártis qomaqty qarjyny áli tólep bitire almaǵanyn aitty.
