Shyǵys Qazaqstan oblysynyń Aiagóz qalasyndaǵy arnaiy áleýmettik kómek ortalyǵyndaǵy tórt balanyń ólimine qatysty sot úkimi shyqty.
Sot sheshimi boiynsha balalardyń ólimine úsh meditsina qyzmetkeri kináli dep tanyldy, dep habarlaidy "Ult aqparat" Aiagóz aýdandyq sotynyń baspasóz qyzmetine silteme jasap.
Sottyń baspasóz qyzmeti «meditsina qyzmetkerlerine mindettemelerin oryndamaǵan, osynyń saldarynan balalar kóz jumǵan» degen aiyp taǵylǵanyn habarlaidy. Is sotqa protsessýaldyq kelisimmen jetken. Prokýror men sottalýshylar jábirlenýshiniń kelisimimen (balalar ortalyǵy) protsessýaldyq kelisimge kelgen.
Kelisimdi negizge ala otyryp, prokýror meditsina qyzmetkerleriniń ekeýiniń 2 jylǵa bas bostandyǵyn shekteýdi, olarǵa 1 jyl boiy meditsinalyq jumysty atqarýǵa tyiym salýdy, al úshinshi qyzmetkerdiń 3 jyl 6 aiǵa bas bostandyǵyn shekteýdi, oǵan 1 jyl 6 ai boiy meditsinalyq jumysty atqarýǵa tyiym salýdy suraǵan. Sotta taraptardyń bári de, onyń ishinde jábirlenýshi tarap ta osy kelisimdi maquldaitynyn jetkizdi.
Sotta atalyp ótkendei, QR Qylmystyq kodekstiń 317-baby 3-bóligi aýyr qylmys sanatyna jatpaidy. Al 317-baptyń 4-bóligi aýyrlyǵy ortasha qylmys sanatyna jatady. Prokýror usynǵan jaza baptyń sanktsiiasyna sai kelgen. Sottalýshylar buryn isti bolmaǵan. Kelisimde kórsetilgen jazadan aýyr jaza berýge bolmaidy. Baiandalǵan istiń negizinde sot aiyptalýshylardy kináli dep tanyp, olarǵa kelisimge sáikes jazany taǵaiyndady. Úkim zańdy kúshine engen joq.
Aita ketsek, buǵan deiin osy ortalyqtaǵy on shaqty balanyń «qyzylsha» diagnozymen infektsiialyq aýrýhanaǵa túskeni habarlanǵan edi. Aýrýhanaǵa jetkizilgen balalardyń tórteýi kóz jumǵan edi.
