Sýret ashyq derekkózden alyndy
Sot «Arhitektory býdýshego» qoryn qurýshyǵa qatysty úkim shyǵardy, dep habarlaidy "Ult aqparat".
"21 tamyzda Astana qalasynyń qylmystyq ister jónindegi aýdanaralyq soty «Arhitektory býdýshego» zańsyz qorynyń negizin qalaýshy A.-ǵa qatysty úkim shyǵardy.
A. qyzmeti azamattardy quqyqqa qaishy áreketter jasaýǵa yntalandyrýmen ushtasatyn qoǵamdyq birlestikti (QK 404-babynyń 1-bóligi), sondai-aq qoǵamdyq sharalardy ótkizý kezinde qoǵamdyq tártipti buzý qaýpin týdyratyn jalǵan aqparat taratýmen ainalysqan qoǵamdyq birlestikti qurdy jáne oǵan basshylyq jasady (QK 274-baby 4-bóliginiń 2) tarmaǵy) dep aiyptaldy" - delingen habarlamada.
Sot málimetinshe, 2019 jyly A. aýyl sharýashylyǵyn damytý, dándi-burshaqty jáne maily daqyldardy, onyń ishinde tuqym sharýashylyǵyn ósirýmen ainalysatyn kompaniia qurǵan. 2020 jyldyń mamyr-maýsym ailarynda ol Kanadadan Aqmola jáne Soltústik Qazaqstan oblystarynyń egistikterine egilgen aýyl sharýashylyǵy daqyldarynyń tuqymyn ákelgen.
Al 2020 jyldyń tamyz aiynda naqty ónimdilikti bilmei turyp, egin jinaýǵa deiin, onyń kompaniiasynyń tiimdiligi týraly azamattarda jalǵan túsinik qalyptastyrý maqsatynda A. «Arhitektory býdýshego» filmin túsirgen.
Bul filmde 35-50 ts/ga kóleminde bidai egininiń orasan zor nátijelerin alý týraly kórineý jalǵan aqparat aitylǵan, bul Qazaqstan boiynsha ónimdilikten 400 paiyzǵa joǵary. Alaida 2020 jyly naqty jinalǵan bidai ónimi tek 11,44-ten 20,4 ts/ga-ǵa deiin bolǵan.
"2020 jyldyń qyrkúieginde A. atalǵan filmde taratylatyn aqparattyń jalǵan ekenin túsine otyryp, ony «YouTube»-te jariialady.
Sonymen qatar 2020 jyldyń qazan aiynda ol óz kompaniiasynyń jobasyn júzege asyrý úshin memlekettik organdardan egistik jerlerdi berýdi talap etken. Osy ótinishterde ol sondai-aq Soltústik Qazaqstan boiynsha kórsetkishten 4 ese asatyn Kanadadan alynǵan tuqymdar negizinde qol jetkizgen ónimdiligi týraly kórineý jalǵan aqparatty kórsetti.
Budan ári A. 2021 jylǵy qańtarda QR boiynsha 15-ten astam filial asha otyryp, «Genezis» qaýymdastyǵyn («Arhitektory býdýshego» qory) zańdy tirkeýsiz qurdy. Osy birlestiktiń qyzmeti aiasynda A. Úkimetten 5 mln. gektar jer berýdi talap etip, petitsiiaǵa qol jinaýdy uiymdastyrǵan. Barlyǵy 300 myńǵa jýyq adam adastyrylyp, petitsiiaǵa qol qoiǵan.
2022 jylǵy 8 mamyrda tegin kontsert túrindegi miting ótkizý maqsatynda Qazaqstannyń túkpir-túkpirinen «Genezis» birlestiginiń qatysýshylaryn Astana qalasyna shaqyrǵan. Alaida, is-shara ótkizilgen joq" - delingen sot habarlamasynda.
Ári qarai, 2022 jyldyń 26 qarashasynda A. Astana qalasyndaǵy túngi klýbta 300-den astam adamdy jinap, onda «Arhitektory býdýshego» filmin kópshilik aldynda kórsetip, onyń jobasyn maquldaýdy talap etý maqsatynda jinalǵandardy «Aqorda» baǵytynda mitingke shyǵýǵa shaqyrdy. Al zańsyz aktsiiaǵa qatysýshylar quqyq qorǵaý organdarymen ustaldy.
"Sottalýshynyń kinási kýágerlerdiń aiǵaqtarymen, mamandardyń qorytyndylarymen, júrgizilgen saraptamalarmen, zattai dáleldemelermen jáne qylmystyq istiń basqa da materialdarymen dáleldendi.
Sot úkimimen A. QK-niń 274-baby 4-bóliginiń 2) tarmaǵynda, 404-babynyń 1-bóliginde kózdelgen qylmystar jasaǵany úshin kináli dep tanyldy jáne qylmystyq quqyq buzýshylyqtar jiyntyǵy boiynsha 5 jyl merzimge qoǵamdyq birlestikterdi qurýǵa jáne basqarýǵa bailanysty qyzmetpen ainalysý quqyǵynan aiyryla otyryp, 7 jylǵa bas bostandyǵynan aiyryldy.
Sot qylmystyq jaýaptylyq pen jazany jeńildetetin mán-jailar retinde jas balalarynyń bolýy men sottylyǵynyń joqtyǵyn tanydy. Aýyrlatatyn mán-jailar anyqtaǵan joq" - delingen habarlamada.
Úkim zańdy kúshine engen joq.
