Almaty qalalyq sotynda «Sporttyq nysandar direktsiiasy» JShS-ne qatysty ákimshilik is aiaqtaldy, dep habarlaidy "Ult aqparat".
Qyrkúiek aiynda Almaty qalasynyń mamandandyrylǵan aýdanaralyq ákimshilik soty Almatydaǵy Sporttyq nysandar direktsiiasyn «Terrorizmge qarsy is-qimyl týraly» Qazaqstan Respýblikasy Zańynyń jáne «Terrorizmge osal obektilerdi terrorizmnen qorǵaý júiesine qoiylatyn talaptardy bekitý týraly» Úkimet qaýlysynyń talaptaryn birneshe ret buzdy degen aiyp taqqan bolatyn.
Ortalyq stadiondaǵy buzýshylyqtardy tamyz aiynda Bostandyq aýdanynyń politsiiasy tekserý kezinde anyqtaǵan. Osydan eki jyl buryn atalmysh nysan Almatydaǵy «Sporttyq nysandar direktsiiasy» JShS-niń senimgerlik basqarýyna berilgen.
«Kásiporynnyń kinási — ákimshilik quqyq buzýshylyqqa jol bergeni. Oǵan onyń ókiliniń bergen túsiniktemelerinen basqa, senimdi dálelder bar. Bul sonymen qatar, ákimshilik quqyq buzýshylyq týraly hattamamen, tekserýdi taǵaiyndaý týraly aktimen, tekserý paraǵymen jáne tekserý nátijeleri týraly aktimen, politsiia qyzmetkeriniń bergen esebimen jáne basqa da materialdarmen rastaldy. Óz kezeginde JShS ókili kinásin tolyq moiyndady», - dep habarlady qalalyq sot.
Apelliatsiialyq aryzda JShS ókili politsiia qyzmetkerleri anyqtaǵan buzýshylyqtardyń joiylǵanyn jetkizdi. Budan basqa buzýshylyqtardy joiý úshin ýaqyt kerektigin aitty.
«QR Ákimshilik quqyq buzýshylyq týraly kodeksiniń 57-babynda kórsetilgen ákimshilik quqyq buzýshylyq úshin jaýapkershilikti aýyrlatatyn jaǵdailar bolǵan joq. Sonymen birge, birinshi satydaǵy sottyń joǵaryda atalǵan jeńildetetin mán-jailary quqyq buzýshyǵa sanktsiia berý kezinde eskerilmedi. Apelliatsiialyq sotta JShS ókili hattamada kórsetilgen eskertýlerdiń 90% joiylǵanyn túsindirdi», - dedi sot.
Almaty qalalyq sotynyń azamattyq ister jónindegi sot alqasy birinshi satydaǵy sottyń aiyppul túrindegi jazany qoldaný týraly sheshimin qoldady.
