Qyrǵyz Respýblikasynyń jańa prezidenti Sooronbai Jeenbekov Qazaqstan Respýblikasymen qurmet ustanymdaryna negizdelgen qarym-qatynas quratynyn atap ótti. Bul týraly ol elder arasyndaǵy diplomatiialyq keleńsizdikter týraly suraqqa bergen jaýabynda aitty, - dep habarlaidy kaz.tengrinews.kz tilshisi prezidenttik doda jeńimpazynyń brifinginen.
"Árbir memleket - egemen memleket. Olar bir-birine qurmetpen qaraýy kerek, sonda ǵana máseleler ózdiginen sheshiledi. Biz osy baǵytta jumys istep jatyrmyz, biz barlyǵyna da qurmetpen qaraimyz. Ásirese kórshi elderge, qarym-qatynasymyz osylai jalǵasady", - dedi Sooronbai Jeenbekov.
Tengrinews.kz tilshisiniń Qazaqstan lideri Nursultan Nazarbaevqa degen qarym-qatynasy jaily suraǵyna Sooronbai Jeenbekov ózara qurmetke negizdelgen qarym-qatynastyń jalǵasatynyn málimdedi.
"Ol - bizdiń kórshiles aǵaiyndy eldiń prezidenti. Áriptes memleketterge jáne el basshylaryna qurmetpen qaraimyz jáne osy qarym-qatynasty jalǵastyramyz", - dedi Jeenbekov.
Qyrǵyzstannyń besinshi prezidenti jaqtastaryna jáne qatysy barlarǵa alǵys aitty. "Maǵan qoldaý bildirgenniń barlyǵyna alǵys aitamyn. Ásirese, kún-tún demei, qajyrly eńbek etken komandama erekshe alǵys aitamyn. (...) Qarsylastaryma alǵys aitamyn. Qatań básekelestik jaǵdaiynda jumys istep, ózin laiyqty kórsete bilgen qarsylastaryma alǵys bildiremin. Osy jumystaryńyz úshin jýrnalister, sizderge de alǵys aitamyn. Sizder sailaýdyń ádil ári ashyq ótýine sep boldyńyzdar. Maǵan qoldaý bildirgen halqyma alǵys aitamyn. Sailaýdan keiin maǵan artylǵan jaýapkershilikti sezemin, elimniń, memleketimniń aldyndaǵy jaýapkershiligim bar. Halqymnyń senimin aqtaý úshin qoldan kelgendi jasaimyn. Basty maqsatym - sońǵy alty jylda bizdiń jetken jetistigimiz kóp - tirshilik tynysymyzdaǵy barlyq salada damydyq - osynyń barlyǵyn saqtap qalý, nyǵaita túsý, bastalǵanda aiaqtaý, alda kóptegen reformalar bar, osy reformalardy sońyna jetkizý kerek. Barlyǵyńyzǵa kóp raqmet, barlyǵyńyzǵa rizamyn", - dedi Sooronbai Jeenbekov.
Keshe sotsial-demokratiialyq partiianyń atynan shyqqan Sooronbai Jeenbekov Qyrǵyzstandaǵy prezident sailaýynda 54,75 paiyz daýys jinap, jeńiske jetken edi.
Jeenbekovtiń shtabyndaǵylar jeńisti toilap jatyr.
Qyrǵyz Respýblikasynyń Ortalyq sailaý komitetiniń málimetinshe, biýlletenderdiń 97 paiyzy daýystardy avtomat esepteý júiesi arqyly eseptelgen. Óz kezeginde kandidat Omýrbek Babanovtyń shtaby qazirgi ýaqytta "aldyn ala avtomat sailaý biýlletenderin salatyn arnaiy jáshikterdiń esepteýshindegi erejebuzýshylyqtardyń jáne sáikessizdikter týraly barlyq derek jinaqtalyp jatqanyn" málimdedi.
Qyrǵyz Respýblikasynyń eks-premer-ministri Omýrbek Babanov 33,8 paiyz daýys jinap, ekinshi oryn aldy. Úshinshi orynda "Býtýn Qyrǵyzstan" partiiasynyń basshysy Adahan Madýmarov - 6,47 paiyz daýys jinaǵan.
Respýblika boiynsha 2 375 sailaý ýchaskesi jumys istedi, onyń 234-i Bishkekte.
Eske sala keteiik, osyǵan deiin 12 qazannan bastap Bishkektegi ishki ister organdarynyń barlyq quramynyń kúsheitilgen rejimge ótkeni habarlanǵan bolatyn.
