QR Premer-Ministriniń orynbasary Roman Skliar qoldanystaǵy órt-qutqarý tehnikasy men órt-tehnikalyq jabdyqtardy jańǵyrtý sharalaryn qaita qaraýǵa qatysty depýtattyq saýalǵa jaýap berdi, dep habarlaidy QazAqparat.
«2018-2020 jyldarǵa arnalǵan azamattyq qorǵaý bólimshelerin materialdyq-tehnikalyq jaraqtandyrý týraly» jol kartasyna sáikes, jalpy somasy 33,4 mlrd teńgege túrli maqsattaǵy 597 dana tehnika, 22 myńnan astam órt-qutqarý jabdyqtary satyp alyndy. 2021-2023 jyldarǵa arnalǵan tiisti jol kartasynda jalpy somasy 47,9 mlrd teńgege 731 órt-qutqarý tehnikasyn, 21362 órt-tehnikalyq jáne apattyq-qutqarý jabdyqtaryn jáne 9492 arnaiy jabdyq satyp alý kózdelgen», - dep jazdy Roman Skliar óz jaýabynda.
Onyń aitýynsha, atalǵan jol kartasyn iske asyrý órt-qutqarý bólimsheleriniń tehnikalyq jaraqtaný deńgeiin 18%-ǵa arttyrýǵa múmkindik beredi. Biyl jergilikti atqarýshy organdar jalpy somasy 8,7 mlrd teńgege túrli maqsattaǵy 192 avtotehnika men 1543 jabdyq satyp alýdy josparlady.
«Respýblikalyq biýdjettik komissiia 2022 jyly respýblikalyq biýdjetten 39 dana órt tehnikasyn satyp alý úshin 2,1 mlrd teńge qarajat bólýdi qoldady. Budan basqa, biyl 24 qyrkúiekte Reformalar jónindegi joǵary keńes otyrysynda Memleket basshysy «Qaýipsiz el» ulttyq jobasyn maquldady. Sonyń sheńberinde 2025 jylǵa deiin halyqty jáne aýmaqtardy tótenshe jaǵdailardan qorǵaý, azamattyq qorǵaý kúshteri men quraldarynyń daiyndyq deńgeiin arttyrý, onyń ishinde órt depolary men órtke qarsy qurylymdar qurý, áýe kemelerin satyp alý, azamattyq qorǵanystyń áskeri bólimderin jaraqtandyrý sharalary kózdelgen», - dedi R. Skliar.
