Parlament Senatynyń jalpy otyrysynda «Qazaqstan men Ýkraina arasyndaǵy ekstraditsiialaý týraly shartty ratifikatsiialaý týraly» Zańy qabyldandy, dep habarlaidy "Ult aqparat".
Qazaqstan men Ýkraina arasyndaǵy ekstraditsiialaý týraly shart 2018 jyly qazanda elordada jasaldy.
«Búginde Ýkrainamen arada qylmystyq qýdalaý salasynda ózara senim qalyptasqan. Sońǵy úsh jylda Ýkraina bizge 6 qylmyskerdi ustap berdi. Qazir atalǵan elde jasyrynyp júrgen 6 adam bar. Olardy qaitarý qaralyp jatyr. Bul shart sol qarym-qatynasty joǵary dárejede bekitip, yntymaqtasýdyń jalǵasy bolmaq», - dedi QR Bas prokýrorynyń orynbasary Marat Ahmetjanov.
Onyń aitýynsha, bul shart qylmystyq jaýapqa tartý jáne sot úkimin oryndaý úshin adamdardy ustap berý máselesin sheshedi. Shart boiynsha jasalǵan qylmys úshin eki elde de keminde bir jylǵa bas bostandyǵynan aiyrý kózdelgen bolsa nemese sottalǵan adamnyń ótelmegen merzimi 6 aidan kóp bolsa ol ustap beriledi. Árine, adamdy berýden bas tartý negizderi de kózdelgen.
Mysaly, bir tarapta qylmys dep sanalatyn áreket ekinshi jaqta olai bolmasa nemese qýdalaý merzimi ótip ketse, suralyp otyrǵan áreket áskeri qylmysqa jatsa, ustap berý egemendik pen ulttyq qaýipsizdikke nuqsan keltiretin bolsa, sondai-aq Qazaqstannyń zańnamasyna nemese halyqaralyq mindettemelerge qaishy kelse.
«Búginde eki el arasynda bul másele Minsk konventsiiasymen rettelýde. Konventsiia ekijaqty shart jasaýǵa tyiym salmaidy», - dedi M. Ahmetjanov.
Onyń atap ótýinshe, osy tektes qujattar 21 elmen bekitilgen.
