«Veterinariia týraly» Zań qabyldanǵan kezden bastap búgingi kúnge deiin veterinariia júiesi jyldan-jylǵa ózgeristerge ushyraýda. Bul týraly Senattaǵy parlamenttik tyńdaýda depýtat Muhtar Jumaǵaziev aitty, dep habarlaidy QazAqparat.
«Memleket basshysy veterinariia júiesin reformalaý jóninde naqty sharalar qabyldaýdy tapsyrǵan. Bul salada qordalanǵan máseleler az emes. Mysaly, 2002 jyly «Veterinariia týraly» Zań qabyldanǵan kezden bastap búgingi kúnge deiin veterinariia júiesi jyldan-jylǵa ózgeristerge ushyraýda. Alaida, aitarlyqtai ózgerister baiqalady dep aitý qiyn. Onyń ústine, qazirgi zamanaýi ǵylymi jáne tehnologiialyq jetistikterden artta qalýy sebebinen kúrdelene tústi. Sondyqtan, veterinariia salasynda úderisterdi tsifrlandyrý, málimetti jinaý ári ony avtomattandyrý, kadrlardy daiarlaý jáne olardyń jalaqysyn arttyrý ózekti máselelerdiń biri», - dedi Jumaǵaziev «Aýyl sharýashylyǵyn damytýdyń ózekti máseleleri men perspektivalary» taqyrybyna arnalǵan parlamenttik tyńdaýda.
Osy oraida ol veterinariialyq qaýipsizdigine toqtala kele, aýyl sharýashylyǵy janýarlaryn emdeý, boljaý jáne aldyn alý ádistemelerin jetildirý kerek ekenin aitty.
Senatordyń paiymynsha, aýyl sharýashylyǵy janýarlaryn diagnostikalaý ári emdeýge arnalǵan veterinariialyq preparattardyń sapasy men qoljetimdiligin uiymdastyrý jáne otandyq preparattar úlesin arttyrýdy qarastyrý mańyzdy.
«Máselen, sońǵy úsh jylda 21,7 mlrd teńgege vetpreparattar satyp alynǵan, sonyń ishinde 49% otandyq ónim bolsa, qalǵany importtalǵan. Sondyqtan otandyq vetpreparattardyń sapasy men qoljetimdiligin arttyrý úshin Aýyl sharýashylyǵy ministrligi men otandyq taýar óndirýshiler arasynda uzaq merzimdi kelisimsharttar jasasý jáne birinshi kezekte satyp alýdy tek otandyq óndirýshiler arasynda ótkizý kerek. Asa qaýipti aýrýlar boiynsha bir kózden alý tásilimen memlekettik satyp alýdy júzege asyrý qajet», - dedi Muhtar Jumaǵaziev.
