Taraz qalasynyń burynǵy ákimi Qairat Dosaev Facebook-tegi paraqshasynda Qasym-Jomart Toqaevtan ózin memlekettik qyzmetke qaita qabyldaýdy ótindi, dep habarlaidy Ulysmedia.kz.
Eske sala keteiik, Qairat Dosaev – eń qysqa merzimdi taǵaiyndaý boiynsha rekord ornatqan eks-sheneýnik. Onyń tabiǵi resýrstar jáne tabiǵatty paidalanýdy retteý basqarmasynyń basshysy laýazymyndaǵy qyzmeti bir táýlikke sozyldy. Oǵan deiin Dosaev Taraz qalasynyń ákimi bolǵan, biraq 2019 jylǵy qarashada Memleket basshysynyń tapsyrmasy boiynsha "jumystaǵy júieli olqylyqtar úshin" qyzmetinen bosatylǵan. Buǵan mektep dárethanasynda on eki jasar mektep oqýshysynyń zorlanýy sebep boldy.
Qairat Dosaevtyń aitýynsha, "mektep dárethanalary máselesin sheshýge qoly timegen".
"Meni nege eki ret jazalady? Asqar Myrzahmetovtiń tusynda eńbek inspektsiiasy basqarmasynyń bastyǵy bolyp taǵaiyndaldym emes pe? Qazir men sanatta joq adamǵa ainaldym, bolǵan oqiǵadan keiin meni eshbir basshy jumysqa almaidy", - dep atap ótti óz sózinde Dosaev.
Prezidentke arnaǵan sóziniń sońynda Dosaev: "Men óz halqymnyń igiligi úshin jumys istegim keledi. Memlekettik qyzmette istegen jyldary atyma, ar-ujdanyma kir keltirgen joqpyn. Meni túsinesiz degen oidamyn, Prezident myrza!
Eger siz senim bildirseńiz, men ári qarai da memleketke paidamdy tigizýge daiynmyn. Memlekettik qyzmetshi retinde meniń bolashaǵym sizdiń qolyńyzda, óitkeni men sizge berilgen qate aqparattan keiin qyzmetimnen bosatyldym. Endi sizdiń aralasýyńyzdan keiin ǵana memlekettik qyzmetke orala alamyn. Siz meniń sońǵy úmitimsiz, Prezident myrza!» dep jazǵan.
