Qazaqstandyq memlekettik joǵary oqý oryndarynyń 800-den astam stýdenti sońǵy 2 jylda halyqaralyq olimpiadalar men konkýrstardyń jeńimpazy atandy, dep habarlaidy "Ult aqparat" QR Bilim jáne ǵylym ministrliginiń baspasóz qyzmetine silteme jasap.
Ulttyq jáne memlekettik joǵary oqý oryndarynyń 800-den astam stýdenti sońǵy eki jylda halyqaralyq olimpiadalar men konkýrstardyń jeńimpazdary atandy. Stýdentterdiń jetistikteri boiynsha úzdik 5 memlekettik joǵary oqý oryndarynyń qataryna L.N.Gýmilev atyndaǵy EUÝ, Abai atyndaǵy QazUPÝ, ál-Farabi atyndaǵy QazUÝ, Qaraǵandy tehnikalyq ýniversiteti, M. Ótemisov atyndaǵy Batys Qazaqstan ýniversiteti kirdi.
Mysaly, ótken oqý jylynda L. N. Gýmilev atyndaǵy EUÝ-diń 87 stýdenti IV Búkilreseilik olimpiadada, «CISCO STARS-2019» jelilik tehnologiialar boiynsha halyqaralyq olimpiadada, halyqaralyq pándik olimpiadada, Regional Final of Huawei ICT Competition in Eurasia 2019-2020 jáne basqa da jarystarda júldeli oryndarǵa ie boldy.
Sondai-aq EUÝ stýdentteri pándik olimpiadalarda ǵana emes, túrli shyǵarmashylyq jáne sporttyq jarystarda joǵary nátijelerge qol jetkizdi. Máselen, «E-STUDIO» vokalisteri Ýkraina men Ózbekstandaǵy halyqaralyq baiqaýlardyń jeńimpazdary atandy. Dombyrashy-stýdentterden quralǵan «Dala sazy» orkestri «DUBAI MUSIC FESTIVAL-CONTEST» halyqaralyq baiqaýynda jeńiske jetti. Ál-Farabi atyndaǵy QazUÝ stýdentteri halyqaralyq olimpiadalarda bilim deńgeileriniń jaqsy ekenin kórsetti. Joǵary oqý ornynyń stýdentteri POSCO halyqaralyq qorynyń (Koreia), Heiwa Nakajima Foundation (Japoniia), «MOPGA» (Frantsiia) stipendiattary, sondai-aq «Erasmus», DORA halyqaralyq granttarynyń iegerleri atandy.
Abai atyndaǵy QazUPÝ stýdentteri de kózge tústi. 2020 jyly bul oqý orny pedagogikalyq JOO stýdentteri arasynda jaratylystaný-ǵylymi pánder boiynsha ótken halyqaralyq olimpiadada júldeli orynǵa ie boldy. Sonymen qatar 18 stýdent pen magistrant QR Bilim jáne ǵylym ministrliginiń I, II, III dárejeli diplomdaryna ie boldy. Sonymen birge QazUPÝ bilim alýshylary stýdentter men magistranttar arasynda respýblikalyq pándik olimpiadalar men ǵylymi-zertteý jumystary konkýrstarynyń jeńimpazdary atandy.
Óńirlik joǵary oqý oryndarynyń oqýshylary da joǵary nátije kórsetti. Máselen, Qaraǵandy tehnikalyq ýniversitetiniń stýdentteri «Terricone valley IT-WEEK.KZ 2019» halyqaralyq forýmynyń hakatonynda birinshi orynǵa ie bolyp, basqa da halyqaralyq stýdenttik konkýrstar men ǵylymi-zertteý jobalarynda joǵary nátijege qol jetkizdi.
Stýdentterdiń jetistikteri boiynsha úzdik bestikti M.Ótemisov atyndaǵy Batys Qazaqstan ýniversiteti qortyndylady. JOO-nyń 50-den astam stýdenti Halyqaralyq ǵylymi-zertteý konkýrstary men olimpiadalardyń jeńimpazdary atandy.
