Jýyrda Qazaqstan Respýblikasy Memlekettik rámizderiniń 25 jyldyǵy jáne Almaty oblysynda qurylǵan «Jalaiyr Shora» búrkitshiler mektebiniń 30 jyldyǵyna orai Eskeldi aýdany Cyrymbet aýylynda «Saiat» Ulttyq sport túrleri boiynsha «Sonar-2017» Halyqaralyq qusbegiler jarysy ótti.
Úsh kúnge sozylǵan jarysqa elimizdiń ár óńirinen jáne kórshi Qytai, Mońǵoliia, Qyrǵyzstan memleketterinen uzyn sany 60-tan astam qusbegi qatysty. Ulttyq búrkitshilik ónerdi qaita túletýdi maqsat etken osy sharanyń ashylýynda Almaty oblysy ákiminiń orynbasary Jaqsylyq Omar qatysýshylar men jinalǵan kópshilikti quttyqtai kele, mundai jarystardyń aldaǵy ýaqytta jii ótkizilýine barynsha qoldaý kórsetiletindigin aitty.
Jarystyń birinshi kezeńinde qustardyń ańǵa túsý sheberligi, qusbegimen ara-qatynasy, shyrǵa tartý sheberligi baǵalanyp, myqtylary aqtyq kezeńge ótti. Al, finalda qarshyǵa, itelgi jáne qyran búrkitterdi qusqa, qoian men túlkige salý arqyly jeńimpazdar anyqtaldy.
Sondai-aq, úsh kúnge sozylǵan dástúrli sharany ótkizý barysynda jarysty tamashalaýǵa jinalǵan kópshilik qoldaryna qyran qondyrǵan qusbegilerdiń sal-serilik ónerin de qyzyqtai aldy.
Jarystyń qorytyndysy boiynsha búrkit salýdan Astana qalasynan Serikbek Kúntýǵan, atyraýlyq Arman Kúshqarov, Jambyl oblysynan kelgen Serikbolsyn Jalǵasuly úzdik dep tanylsa, itelgi salýdan Almaty oblysynyń qatysýshylary qara úzip shyǵyp, Qýanysh Isabekov, Medet Shalipov, Dosymjan Jambyl jeńimpaz atandy. Qarshyǵa salý boiynsha jetisýlyq Beksultan Seiitjan, Rinat Myrzabaev jáne Jambyl oblysynan Berikbolsyn Babajan marapattaldy.
Sonymen qatar, úzdik óner kórsetkenderge QR Ulttyq sport túrleri qaýymdastyǵy, QR «Qansonar» ańshylar qaýymdastyǵy jáne «Qyran» federatsiiasy Birjan sal, Aqan seri, Qapez sal atyndaǵy arnaiy syilyqtaryn tabystady.
Jeńimpazdarǵa diplomdar men aqshalai syilyqtar berildi.
Bul jarysty QR Sport komiteti, Almaty oblysynyń ákimdigi, Ulttyq sport túrleri qaýymdastyǵy, "Qyran" federatsiiasy men "Qansonar" ańshylyq ortalyǵy uiymdastyrdy.
