Túrkistan oblysynda aǵymdaǵy jyldyń 9 aiynda 30 436 otbasyǵa (173 620 adam) jalpy somasy 12769 mln teńge kóleminde ataýly áleýmettik kómek taǵaiyndalǵan, dep habarlaidy "Ult aqparat" ákimdikke silteme jasap.
Búgin bul týraly Túrkistan oblysynyń Óńirlik kommýnikatsiialar qyzmetinde ótken brifingte Jumyspen qamtýdy úilestirý jáne áleýmettik baǵdarlamalar basqarmasynyń basshysy Muhit Otarshiev aitty.
Basqarma basshysynyń aitýynsha, shartty aqshalai kómek alýshylardyń óz kásibin ashý úshin kishi biznes jobalar ázirlenip, nátijesinde 15 127 otbasy 17 myńǵa jýyq iri qara mal jáne 14 500 ýaq mal alyp, 1689 otbasy qus sharýashylyǵymen shuǵyldanyp otyr. Sondai-aq, halyqqa qyzmet kórsetý arqyly jalpy 15 127 otbasy ishinen 2580 adam óz isin ashqan.
«Aita keterligi, respýblikanyń soltústik óńirlerine halyqtyń óz erkimen qonys aýdarýy jandanyp keledi. Atalǵan kezeńde oblysymyzdan 263 otbasy, iaǵni 1112 adam qonys aýdaryp, tiisti tólemderdi alýda. Bul respýblika boiynsha soltústikke qonys aýdarǵan adamdardyń 40 paiyzyn qurap otyr», - dedi Muhit Baimuhanbetuly.
Sonymen qatar, múmkindigi shekteýli azamattar men ardagerlerdi áleýmettik qoldaý boiynsha aǵymdaǵy jyly barlyq biýdjetter esebinen 8,6 mlrd teńge qaralyp, múmkindigi shekteýli azamattar 64 myńǵa jýyq tehnikalyq kómekshi quraldarmen jáne áleýmettik qyzmettermen qamtamasyz etilgen.
Zeinetkerlerge áleýmettik qoldaý kórsetý boiynsha 7800 zeinetker basqarmaǵa qarasty «Ardagerler» jáne «Meiir» saýyqtyrý keshenderine joldama alǵan. 80 jastan asqan jalǵyzilikti 310 qariianyń zeinetaqylaryna ai saiyn jergilikti biýdjet esebinen 1 ailyq eseptik kórsetkish mólsherinde kómek berilip keledi. Aǵymdaǵy jyldyń 1 qazanyndaǵy kórsetkish boiynsha oblysta arnaýly áleýmettik qyzmettermen muqtaj azamattardyń 99,7 paiyzy qamtylǵan.
