Soltústik Qazaqstan oblysy Qyzyljar aýdanyna qarasty Shahovskoe aýylynda qazdar jappai qyrylyp jatyr. Aldyn ala málimet boiynsha, aýyl turǵyndary qazdarynyń úshten birine jýyǵy ólgen, dep habarlaidy ult.kz.
Turǵyndardyń aitýynsha, qustar jem jeýden qalyp, búrisip turady. Keiin ishi ótip, denesi dirildep, bir táýlik ishinde ólip qalady. Qazdarǵa dári-dármek berilgenimen, odan nátije bolmaǵan.
Aýyl turǵyndarynyń biri jaǵdaidy bylai sipattaǵan:
«Durys tamaq ishpeidi. Bári búrisip turady. Jasyl tústes ish ótý bastaldy, diril paida boldy. Dári satyp aldyq, biraq kómektespedi. Qazdar qulap jatyr, boldy».
Keibir turǵyndardyń aýlasynda birneshe myń qaz bar. Sondyqtan aýrý qustardy saý qustardan bólek ustaý múmkin emes. Buǵan qosa, turǵyndardyń aitýynsha, aýrý qustar bir táýlik ishinde ólip qalady.
Veterinariialyq qyzmet mamandary qyrylǵan qustardan patologiialyq jáne biologiialyq materialdar alǵan. Zertteý nátijesinde qus tumaýy, Niýkasl aýrýy, pasterellez jáne salmonellez boiynsha alynǵan synamalar teris nátije kórsetken.
Qustardyń jappai qyrylý sebebi ázirge anyqtalǵan joq. Materialdar qosymsha zertteý úshin Astanadaǵy Veterinariia jónindegi ulttyq referenttik ortalyqqa jiberildi.
Aita keteiik, 2025 jylǵy qarashada osy Shahovskoe aýylynda shamamen 7 myń qaz qyrylǵan bolatyn. Sol kezde turǵyndardyń shyǵyny 10 million teńgeden asqan. Qustardyń naqty diagnozyn anyqtaýǵa birneshe apta ketkenimen, ýáde etilgen ótemaqyny tóleý mehanizmi de naqty belgilenbegen edi.
Arada bir jylǵa jýyq ýaqyt ótkende aýylda jaǵdaidyń qaita qaitalanýy turǵyndardy alańdatyp otyr.
