Túrkistan oblysynyń bir top jýrnalisi «Túrkistan – Qyzyljar – Qostanai – Kókshetaý» aqparattyq týry aiasynda soltústik óńirge sapar shekti. Bul týraly Túrkistan oblysy ákiminiń baspasóz qyzmetinen málim etti.
Aqparattyq týrdyń basty maqsaty – kúngeiden soltústikke kóship barǵan otbasylardyń turmys-tirshiligimen tanysý.
Osy oraida, Túrkistan oblystyq Qoǵamdyq damý basqarmasynyń uiymdastyrýymen Petropavl qalasynda Túrkistan oblystyq máslihatynyń depýtaty Jańabai Aǵabekov jáne Túrkistan oblysy Qoǵamdyq damý basqarmasy basshysynyń orynbasary D.Júnisov, Túrkistan oblysy jumyspen qamtýdy úilestirý jáne halyqty áleýmettik baǵdarlamalar basqarmasy basshysynyń orynbasary Nurjan Nurashevtiń qatysýymen baspasóz máslihaty ótti.
Elbasy N.Nazarbaevtyń tapsyrmasy boiynsha 2015 jyldan bastap elimizdiń jumys kúshi az soltústik óńirlerine halqy tyǵyz ornalasqan ońtústik aimaqtardan halyqty óz erkimen qonystandyrý, olarǵa qajetti jaǵdai jasaý jumystary bastalǵan bolatyn. Búgingi tańǵa deiin qonys aýdarǵandardyń basym bóligi turǵyn úimen, jumysqa qabiletti otbasy músheleri jumyspen qamtylǵan. Óz kásibin ashamyn deýshilerge egin, mal sharýashylyǵymen shuǵyldanýǵa jer telimderi, bos turǵan ǵimarattar usynyldy. Azamattardyń barlyǵy kóship- qonýǵa bailanysty memleket tarapynan beriletin qarjylai kómektermen qamtamasyz etilýde.
Aita keteiik, Túrkistan oblysynan qonys aýdarýshylar atalmysh baǵdarlamaǵa qatysýshylardyń 60 paiyzyn quraidy.
Jumys kúshi tapshy óńirlerdi eńbek kúshimen qamtamasyz etý, óńirlik disproportsiia men demografiialyq teńgerimsizdikti joiý maqsatynda baǵdarlama sheńberinde erikti túrde qonys aýdarýǵa járdem retinde óńiraralyq qonys aýdarýdy memlekettik qoldaý:
1) kóshýge materialdyq kómek berýdi,
2) turǵyn úidi jaldaý (jalǵa alý) jáne kommýnaldyq qyzmetterge aqy tóleý boiynsha shyǵystardy óteýdi;
3) qyzmettik turǵyn úi nemese eńbekshi jastar úshin JJK 2020 baǵdarlamasy sheńberinde salynǵan (satyp alynǵan) jataqhanalardan bólmeler berýdi;
4) qonys aýdarýǵa járdem kórsetetin jumys berýshilerge sýbsidiialar berýdi;
5) qajet bolǵan kezde tehnikalyq jáne kásiptik bilim alý úshin oqytýǵa jáne qysqa merzimdi kásiptik kýrstarǵa jiberýdi;
6) jańa turǵylyqty jerinde jumysqa ornalasýǵa jáne kásipkerlikti damytýǵa járdemdesýdi qamtidy.
Baǵdarlamaǵa qatysýshyǵa jáne onyń otbasy múshelerine – otaǵasyna jáne árbir otbasy múshesine bir ret 35 AEK (88375 tenge) mólsherinde kóshýge materialdyq kómek beriledi.
Baǵdarlama bastaý alǵan sátten bastap 2019 jyldyń 1 shildesine deiin Túrkistan oblysynan 282 otbasy Soltústik óńirlerge qonys aýdardy.
Onyń ishinde:
- 22 otbasy, 92 adam Qostanai oblysyna;
- 46 otbasy, 90 adam Shyǵys Qazaqstan oblysyna;
- 94 otbasy, 282 adam Soltústik Qazaqstan oblysyna;
- 44 otbasy, 219 adam Pavlodar oblysyna kóship bardy.
Qonys aýdarǵan 683 adamnyń 287-si eńbekke qabiletti bolsa, 204 adam turaqty jumyspen qamtylyp, 8 adam jeke kásibin ashty. Al 75 turǵyn bala kútimimen ainalysyp, úi sharýasyn dóńgeletip otyr.
Halyqty yntalandyrý maqsatynda Túrkistan oblysyna soltústik óńirlerden arnaiy ókilder kelip, kezeń- kezeńimen túsindirý jumystaryn júrgizýde.
Jalpy 2018 jylǵa 8 top, 151 jumys berýshi kelse, 2019 jylǵa 6 top, 96 jumys berýshi oblysta bolyp, halyqqa baǵdarlamanyń tiimdilikterin túsindirdi.
Atalǵan jumystardy jandandyrý maqsatynda Jetisai aýdanynda 2019 jyldyń 24 mamyrynda respýblikamyzdyń Soltústik oblysynan kelgen jumys berýshilerdiń qatysýymen «Óńiraralyq bos jumys oryndary» jármeńkesi ótkizildi. Atalǵan jármeńkege 650-den astam niet bildirýshi azamat qatysyp, 3 myńnan astam bos jumys orny usynyldy.
Sonymen qatar demeýshiler esebinen 150-ge jýyq niet bildirýshi Soltústik óńirlerdiń jerimen, turmys-tirshiligimen tanysyp, óz kózderimen kórip qaitty.
Qazirgi tańda halyqty soltústik óńirlerge qonystandyrý jumystary qarqyndy túrde júzege asyrylýda. Túrkistan oblysynan qyzyǵýshylyq tanytqan turǵyndar sany artyp, qonys aýdarýshylar kóbeiýde.
