Ońtústik Koreia men AQSh áskeri sheneýnikteriniń habarlaýynsha, Soltústik Koreia Japon teńizine qarai ballistikalyq zymyran atqan. Zymyran AQSh prezidenti Donald Tramptyń Pheniannyń basty odaqtasy - Qytai prezidenti Si Tszinpinmen kezdesýiniń qarsańynda jasalyp otyr.
Ońtústik Koreia qorǵanys ministrliginiń búgin taratqan málimdemesinde Soltústik Koreia ballistikalyq zymyranyn Sinpo aýdany mańynan Japon teńizine atqany aitylady. AQSh áskeri sheneýnikteriniń habarlaýynsha, aldyn ala málimetterge sai orta radiýsta áreket etetin KN-15 ballistikalyq zymyrany ushyrylǵan. Amerikalyq áskeriler bul zymyran Soltústik Amerika qurlyǵyna qaýip tóndirmeidi deidi.
Eger zymyran rasymen ballistikalyq bolsa, onda ol Pheniannyń Ońtústik Koreia, Japoniia men AQSh-qa jáne Soltústik Koreianyń ballistikalyq zymyran baǵdarlamasyn aiyptaǵan basqa da memleketterge kezekti doq kórsetýi bolyp sanalady. Synaq Qytaidyń da alańdaýshylyǵyn týdyrdy. Ballistikalyq zymyrandy paidalanyp synaq jasaý - BUU Qaýipsizdik keńesiniń qararyn buzý bolyp sanalady.
AQSh prezidenti Donald Tramp buǵan deiin Qytaidy Phenianǵa zymyran baǵdarlamasyn tejeýine yqpal etýge shaqyrǵan. Ol eger Qytai bul máselege aralasqysy kelmese, onda Vashingtonnyń derbes ózi qimyldai alatynyn da eskertken.
Donald Tramp pen Si Tszinpin 6-7 sáýirde Tramptyń Florida shtatyndaǵy Mar-a-Lago rezidentsiiasynda kezdespek.
