Soltústik Koreia senbi kúni Ońtústik Koreia aýmaǵyndaǵy Shyǵys teńizine qarai eki snariad ushyrdy. Aldyn ala málimet boiynsha, jaqyn dáldikke arnalǵan ballistikalyq raketalar paidalanylǵan. Bul týraly Yonhap agenttigi Ońtústik Koreianyń Shtabtar bastyǵy birlesken komitetine (JCS) silteme jasap habarlady.
Atap ótilgendei, bul mundai seriiadaǵy raketalardyń osy aidaǵy ekinshi ushyrylymy.
Zymyrandar 410 shaqyrym uzaqtyqqa jáne 50 shaqyrym biiktikke ushqan.
«Ońtústik Koreia men AQSh-tyń barlaý organdary ózge málimetterdi taldaýda. Bizdiń áskeriler qosymsha ushyrylymdar bolǵan jaǵdaiǵa jáne shabýylǵa daiyndyqty ustap turý úshin máseleni baqylaýǵa aldy», - delingen JCS málimetinde.
JCS bútin álem koronavirýs pandemiiasyna bailanysty qiyndyqqa ushyraǵan qazirgi kezde ushyrylymdardyń jasalýyn synǵa aldy. Sondai-aq mundai áskeri is-áreketterdi toqtatýǵa shaqyrdy.
Soltústik Koreia zymyrandar synaǵyn biyl úshinshi ret ótkizip otyr. Sońǵy ushyrylym 9 naýryzda jasalǵan bolatyn.
