Soltústik Koreia uzaq qashyqtyqqa ushatyn jańa qanatty zymyranyn synaqtan ótkizdi. Bul jóninde Soltústik Koreianyń ortalyq telegraf agenttigine súiengen "Rionhap" agenttigi jazdy. Ortalyq telegraf agenttigi synaqtyń sátti júrgizilgenin, oǵan joǵary laýazymdy sheneýnikter qatysqanyn habarlaǵan.
Soltústik Koreianyń málimdeýinshe, jańa zymyrandy qurastyrýǵa eki jyl ketken. 11-12 qyrkúiek kúngi synaq barysynda zymyrandar 1,5 myń shaqyrymǵa ushyp, nysanaǵa dóp tiip, Soltústik Koreia aýmaǵyndaǵy teńizge qulaǵan.
Ortalyq telegraf agenttigi jańa zymyrandardy – "mańyzy bar strategiialyq qarý" retinde sipattaǵan. Reuters suhbattasqan sarapshylardyń pikirinshe, Pheniannyń zymyrandardy "strategiialyq" dep ataýyna qaraǵanda ol atom oqtumsyqtarynyń bir bóligi bolýy múmkin.
Naýryz aiynda Soltústik Koreia jańa úlgidegi eki taktikalyq zymyrandy synaqtan ótkizgenin habarlaǵan. Sarapshylar sol kezde muny AQSh ákimshiligi aýysqannan keiin Vashingtonmen kelissózge daiyndyq retinde baǵalaǵan.
Buǵan deiin Soltústik Koreia basshysy Kim Chen Yn men AQSh-tyń burynǵy prezidenti Donald Tramp arasyndaǵy kelissózder tyǵyryqqa tirelgen. Soltústik Koreia basshysy AQSh-tan ekonomikalyq sanktsiianyń kúshin tolyq joiýdy usynǵan edi. Al AQSh odan bas tartqan.
Tamyz aiynyń sońynda Atom energiiasy jónindegi halyqaralyq agenttik (MAGATE) jyldyq esebinde Phenian Ionben ǵylymi-zertteý ortalyǵyndaǵy iadrolyq reaktordy qaita iske qosýy múmkin dep habarlaǵan.
Tamyzda Soltústik Koreia Seýldiń Vashingtonmen birigip ótkizgen áskeri jattyǵýyna jaýap retinde Ońtústik Koreiamen qarym-qatynasty úzgen.
