2016 jyldan beri Soltústik Qazaqstan oblysyna eńbek kúshi artyq óńirlerden 6,5 myń adam kóship barǵan jáne onyń 8 paiyzy keri oralǵan. Bul týraly SQO ákimi Qumar Aqsaqalov aityp berdi, dep habarlaidy QazAqparat.
«Soltústik óńirge qonys aýdarý «Eńbek» baǵdarlamasy aiasynda júzege asyrylyp jatyr. Iaǵni, eńbek kúshi artyq óńirlerde turatyn árbir azamat kóshý múmkindigine ie. Ol úshin otbasynyń árbir múshesine 35 AEK kóleminde ótemaqy tólenedi, bul shamamen 97 myń teńge. Otbasynda 5 adam bolsa, kóshkeni úshin 500 myń teńge ótemaqy alady degen sóz. Baspana jaldaý úshin otbasy aýyldyq jerdi tańdasa – 10-20 AEK, qalany tańdasa – 20-30 AEK aralyǵynda taǵy tólenedi. Iaǵni, memleket aqshany bóledi, adam qaida turatynyn ózi tańdaidy», - dedi ákim Ortalyq kommýnikatsiialar qyzmetinde ótken brifingte.
2019 jyldan bastap, qonys aýdarýshylarǵa úi salyp berý boiynsha oblystyq baǵdarlama iske qosylǵan.
«Aýyl sharýashylyǵy taýaryn óndirýshilerdi turaqty eńbek kúshimen qamtamasyz etý úshin tiisti eńbekaqy men áleýmettik jaǵdai jasaý qajet. Ol úshin taýar óndirýshiler men memleket qajetti mamandarǵa arnap úi salady. Dál qazir bizge traktorshylar, mehanizatorlar, muǵalimder, dárigerler, mal dárigerleri qajet. Bul úide otbasy 5 jyl turǵannan keiin memlekettiń qurylysqa jumsaǵan qarajatyn ótese jetkilikti. Barlyq úiler tehnikalyq tekserýden ótedi, kepildik berilgen 2-3 jyl boiy aqaýlaryn tegin jóndeidi. Ótken jyly 425 úidi paidalanýǵa berdik, biyl 700 úi salynady», - dep túsindirdi Q. Aqsaqalov.
Ákimniń aitýynsha, ótken jyly SQO-ǵa eńbek kúshi kóp óńirlerden 2200 adam, biyl – 1800 adam kóship kelgen.
«Árine olardyń arasynda densaýlyq jaǵdaiymen, otbasylyq sebeptermen týǵan jerine keri oralǵandar bar. Onsyz bolmaidy. Biraq keri oralǵandar sany aitarlyqtai kóp emes. Sondyqtan, bul baǵdarlama bizge qajet jáne ári qarai da júzege asyryla beredi», - dedi Qumar Aqsaqalov.
