Soltústik Qazaqstan oblysyndaǵy Taiynsha qalasynda koronavirýs indetiniń asqynýyna bailanysty karantin sharalary qatańdatylyp, eldi mekenge kirip-shyǵý shekteldi, dep habarlaidy "Ult aqparat".
Búgin SQO taýarlar men kórsetiletin qyzmetterdiń sapasyn baqylaý departamentiniń basshysy Serikbai Qasmaqasov onlain brifing ótkizip, málimdeme jasady.
Oblystyń bas sanitar dárigeriniń aitýynsha, 24 naýryz ben 13 maýsym aralyǵynda SQO-da koronavirýsty infektsiiany juqtyrýdyń 191 deregi tirkelgen. Onyń 84-inde (44%) aýrý belgileri bolsa, qalǵandarynda qaýipti infektsiia tekserý barysynda anyqtalǵan.
«Sońǵy ýaqytta qaýipti indetti juqtyrýdyń 25 jaǵdaiy tirkeldi. Onyń 13-inde aýrý belgileri boldy. 15-i naýqastarmen bailanysta bolsa, 5-ýi aýyryp, dárigerge qaralǵan, 4-i Reseiden kelgenderde, al bireýine diagnoz skriningten ótý barysynda anyqtalyp, qoiyldy», - dedi Serikbai Qasmaqasov.
21 jaǵdai SQO turǵyndaryna qatysty. 16-sy - Petropavlda, úsheýi - Taiynsha, bireýi - Qyzyljar aýdandarynda tirkeldi. Al bir adam Almatydan juqtyryp kelgen.
«Taiynsha qalasynda qaýipti indet sońǵy úsh kúnde tórt ret tirkeldi. Osyǵan bailanysty eldi mekenge kirip-shyǵýǵa shekteý qoiylady, karantindik sharalar qatańdatylady», - dedi oblystyń bas sanitar dárigeri.
Petropavlda koronavirýsty infektsiianyń úsh otbasylyq oshaǵy anyqtaldy. Munda altaýdan segizge deiin jaǵdai tirkelgen. Syrqattardyń jas erekshelikteri de ártúrli.
Osyǵan bailanysty oblys ortalyǵyndaǵy balabaqsha, oqýshylar saraiynyń jáne trenajerlik zaldyń jumysy ýaqytsha toqtatyldy.
