Soltústik Qazaqstan oblysynda taǵy da qus tumaýy tirkeldi. Bul joly Timiriazev aýdanynyń Drýjba eldi mekeninde eki júzden astam úi qusy qyrylyp qaldy, dep habarlaidy QazAqparat.
SQO veterinariia basqarmasynyń málimetinshe, aýrý oshaǵy Timiriazev aýdany Internatsional aýyldyq okrýgine qarasty Drýjba eldi mekeninde tirkeldi. Osyndaǵy 4 úidiń 228 qusy, sonyń ishinde 174 taýyq, 21 qaz jáne 33 kúrke taýyq qyrylyp qalǵan.
«Qustarda aýrýǵa tán belgileri boldy. Iaǵni durys júre almai, bastaryn artqa shalqaita berdi. Dene qyzýy kóterilip, aidarlary kógerdi. Tumsyqtarynan qan ketti. Diagnozdy rastaý úshin Nur-Sultan qalasyndaǵy Ulttyq referenttik ortalyqqa patologiialyq material saraptamaǵa jiberildi. Nátijesinde qus tumaýy diagnozy qoiyldy. Aýrý jaiylmas úshin qustardyń 230 óleksesi mal qorymynda órteldi. Aýrý qozdyrǵyshtaryn joiý maqsatynda qus ieleriniń qora-qopsylary, úilerdiń aýlasy zararsyzdandyryldy», - deidi veterinarlar.
Drýjba eldi mekeninde 88 úi tútin tútetip otyr. Olardyń 1700-den astam qusy bar.
«Qus tumaýy dala qustarynan juqqan. Aýrý anyqtalǵan úilerdiń barlyq qustary joiyldy. Az ǵana qus qyrylǵandyqtan bir ǵana úi karantinge alyndy. Monitoring kúndelikti júrgiziledi. Barlyq tiisti sharalar júzege asyrylyp jatyr. Sonyń ishinde 1600 qusqa vaktsina salyndy. Jyldyń birinshi jarty jyldyǵynda 600 basqa ekpe egilgen edi», - deidi oblys veterinarlary.
