Soltústik Qazaqstan oblysynda qonys aýdarýshylar úshin úsh jyldyń ishinde úsh myń úi salynady, dep habarlaidy "Ult aqparat".
Memleket basshysynyń tapsyrmasymen ázirlengen SQO-ny áleýmettik-ekonomikalyq damytýdyń 2018 - 2021 jyldarǵa arnalǵan keshendi jospary aiasynda baspanalar perspektivalyq eldi mekenderde salynady. Kelesi jyly jergilikti bilik 629 jeke turǵyn úi salýǵa nietti. Taǵy bir jyldan soń - 1 myń, al 2021 jyly 1,5 myń úi boi kótermek.
Oblystyq Qurylys basqarmasynyń basshysy Serik Muhamedievtiń málimetinshe, biylǵy jyly 100-ge jýyq úi salynǵan. Baspana usyný arqyly óńirge basqa oblystardan eńbek resýrstaryn tartý jumystary júrgizilýde. Arnaiy mehanizm da ázirlengen: kásipker úidi óz qarajatyna salyp, mamandardy shaqyrady. Barlyq talaptar saqtalǵan jaǵdaida úiler memlekettik biýdjet qarajatyna satyp alynady. Osyndai alǵashqy úiler Taiynsha aýdanynyń Ilichevka aýylynda salyndy.
«Biyl eńbek resýrstaryn tartý úshin jeke turǵyn úilerdiń qurylysyna kiristik. Aýyldarda úi sala bastadyq. Bekitilgen jobalarda barlyǵy, tipti, tóbe men irgetastyń biiktigi eskerilgen», - dep atap ótken bolatyn keńesterdiń birinde oblys ákimi Qumar Aqsaqalov.
Azamattardy eńbekke jaramdy halqy kóp aimaqtardan Soltústik Qazaqstan oblysyna kóshirý arqyly kóshi-qonnyń teris saldosyn tómendetý shamalanyp otyr. 2021 jylǵa qarai oń saldony 413 adamǵa jetkizý jospary bar.
